Tags-Sahra

tum na paḌhnā vo safar-nāma jo nok-e-ḳhār par
kū-ba-kū sahrā-ba-sahrā aable likhte rahe

chashma-e-chashm ke paanī se nahīñ hogā kuchh
ḳhāk-e-sahrā hai ise ḳhuuñ kī zarūrat hai bahut

chalā huuñ 'uzlat' ab sahrā bagūle kī ziyārat ko
milegā tauf ko majnūñ kā barbād āstāñ dekheñ

nik.hat-e-gul hī nahīñ ḳhaak bhī hai ham ko aziiz
apnā sahrā hai chaman apnā ḳhayābāñ apnā

nikal ke sahrā se jis ne ruumā kī saltanat ko ulaT diyā thā
sunā hai ye qudsiyoñ se maiñ ne vo sher phir hoshiyār hogā

vus.at-e-dāman-e-sahrā dekhūñ
apnī āvāz ko phailā dekhūñ

kabhī paar bhī kar pā.eñgī sukūt ke sahrā ko
darpesh hai kitnā aur safar āvāzoñ ko

jise bhī dekhiye pyāsā dikhā.ī detā hai
koī maqām ho sahrā dikhā.ī detā hai

guzroge jab bhī sahrā se pāoge tum chaman
jaise nigār-e-dasht hai aksar chaman ke ba.ad

sahrā se varna apnā ilāqa nahīñ hai kuchh
āshuftagī-e-sar kī havā hai yahāñ bahut

is ġhalat-bīnī kā koī to natīja hotā
umr bhar bahr-e-balā-ḳhez ko sahrā dekhā

tum saath hamāre chalte the sahrā bhī suhānā lagtā thā
gul-posh dikhā.ī dete the sab ret ke Tiile yaad karo

huuñ maiñ vo lāla-e-sahrā ki huā mere supurd
dasht meñ pairavi-e-bād-e-bahārī karnā

pyaas har zarra-e-sahrā kī bujhā.ī ga.ī hai
tab kahīñ jā ke mirī ābla-pā.ī ga.ī hai

shajar se lipaT kar na ro.egī ye
havā jo chalī hai vo sahrā kī hai

chāñd ko maiñ ne jab bhī dekhā ye ehsās huā
ik sahrā meñ ik dīvāna kaafī hotā hai

kis ne sahrā meñ mirī āñkhoñ ke
ek dariyā ko ravāñ rakkhā hai

maiñ ek buuñd sar-e-nok-e-ḳhār-e-sahrā huuñ
tulū-e-sub.h-e-dam-e-āḳhirī meñ dekh mujhe

jaane kyā guzregā ab qais pe allāh jaane
ret sahrā meñ nahīñ aur na bayābān meñ ḳhaak

paḌh chuke dariyā qasīda abr kā
kyā zabān-e-ḳhushk se sahrā kahe