Tags-Sahra

aañkh jhapkī thī bas ik lamhe ko aur is ke ba.ad
maiñ ne DhūñDā hai tujhe zindagī sahrā sahrā

kisī meñ himmat na thī ki baḌh kar junūñ kī zanjīr thaam letā
ḳhirad kī bastī meñ hai añdherā charāġh sahrā meñ jal rahā hai

ruuh meñ lahr banāte haiñ tirī lahroñ se
aur kuchh der mire sāmne lahrā sahrā

maiñ bhī be-ant huuñ aur tū bhī hai gahrā sahrā
yā Thahar mujh meñ yā ḳhud meñ mujhe Thahrā sahrā

mere lahje kā samundar hī nahīñ sūkhā hai
luT gayā terī hañsī kā bhī sunahrā sahrā

apnī hastī ko bikharne se bachā lenā tum
mujh pe mat jaanā mirī jaan maiñ Thahrā sahrā

mere dil par to girīñ aable ban kar būñdeñ
kaun sī yaad ke sahrā the jo barsāt meñ the

kaisā manzar hai tire hijr ke pas-e-manzar kā
reg-e-sahrā hai ravāñ aur havā sākin hai

chalā hai ghar ko dīvāna uḌā kar ḳhaak sahrā kī
ġhubār-e-ḳhātir-e-ahbāb kāshāne meñ rakh denā

apnā hī to hai shahkār-e-amal tahzīb kā ye zindāñ 'akbar'
ham aaj haiñ shahroñ ke qaidī kal tak āvāra-e-sahrā the

ik jal-thal thī kal tak ye zamīñ ye dasht bhī kal tak dariyā the
ye shor thā kal ik sannāTā ye shahar bhī kal tak sahrā the

jahāñ mere sahāre chhin ga.e the
vo sahrā be-sahārā aañkh meñ hai

pahuñchegā sarāboñ kā vahāñ bhes badal kar
sahrā meñ bhī har lamha sadā degā ye paanī

maiñ kisī paas ke sahrā meñ bikhar jā.ūñgā
tū kisī daur ke sāhil kā samundar hogā

nibhā rahā huuñ maiñ duniyā ke rāh-o-rasm yahāñ
vagarna jism ke sahrā meñ ab bachā kyā hai

rāh-e-sahrā hai na aatī hai kahīñ fasl-e-bahār
ishq meñ dīvāngī jāma-darī kyā dekhnā

aa fasl-e-gul hai ġharq-e-tamannā tire liye
Duubā huā hai rañg meñ sahrā tire liye

maiñ vo sahrā jise paanī kī havas le Duubī
tū vo bādal jo kabhī TuuT ke barsā hī nahīñ

ḳhushk hoñToñ ke tasavvur se larazne vaalo
tum ne taptā huā sahrā kabhī dekhā hī nahīñ