Tags-Sahra

musāfiroñ se kaho apnī pyaas bāñdh rakheñ
safar kī ruuh meñ sahrā koī utar chukā hai

ye vo sahrā hai sujhā.e na agar tū rasta
ḳhaak ho jaa.e yahāñ ḳhaak uḌāne vaalā

raushnī jis kā dil dhaḌaktā thā
duur sahrā ke sārbānoñ meñ

ab junūñ meñ bhī nahīñ aatā hai sahrā kā ḳhayāl
shahr-e-hikmat meñ hai vahshat-ḳhez vīrānī hanūz

sahrā meñ aa nikle to ma.alūm huā
tanhā.ī ko vus.at kam paḌ jaatī hai

dayār-e-sabza-o-gul se nikal kar
dil o jaañ nazr-e-sahrā ho ga.e haiñ

jab tum sahrā meñ apnā mashkīza chhoḌ aa.e
jab tum ek saañp ke saath ho liye

ab najd ke sahrā meñ na kāñTe na sadā.eñ
ab qais hai koī na koī ābla-pā hai

chashmoñ ko shikāyat hai ki sho.aloñ meñ ghire haiñ
sahrā ko ye dukh hai ki paḌā suukh rahā hai

har ek samt yahāñ vahshatoñ kā maskan hai
junūñ ke vāste sahrā o āshiyāna kyā

qais mile to us se pūchhūñ kyā tire jī meñ aa.ī divāne
shahr ko tū ne kis liye chhoḌā kyuuñ ke ḳhush aayā tujh ko sahrā

maiñ jo sahrā meñ kisī peḌ kā saayā hotā
dil-zada koī ghaḌī bhar ko to Thahrā hotā

ret maazī kī mirī āñkhoñ meñ thī
sabz jañgal bhī mujhe sahrā lagā

kah rahe the log sahrā jal gayā
phir ḳhabar aa.ī ki dariyā jal gayā

ham kisī tarah tujhe DhūñD leñ mumkin hī nahīñ
tū ne har raah ko sahrā se milā rakkhā hai

sahrā meñ chal ke ġham ko bhulā do uTho 'jigar'
dekho vo aa rahī hai ghaTā jhūmtī huī

mānind-e-qais ret na sahrā kī chhāniye
kis ko milī hai kis kī ḳhabar raqs kījiye

ḳhushnumā dīvār-o-dar ke ḳhvāb hī dekhā kiye
jism sahrā zehn vīrāñ aañkh giilī ho ga.ī

mālūm hai 'urfī' jo hai qismat meñ hamārī
sahrā hī koī girya-e-shabnam ko milegā

ḳhūn-e-jigar āñkhoñ se bahāyā ġham kā sahrā paar kiyā
terī tamannā kī kyā ham ne jīvan ko āzār kiyā