Tags-Andhera

sub.h-e-nau aa ga.ī tīrgī miT ga.ī shor hai har taraf inqalāb aa gayā
mujh ko Dar hai añdherā koī raat kā muñh pe Daale sahar kī naqāb aa gayā

baaqī thoḌā sā din thā lekin
merī āñkhoñ meñ thā añdherā

jin makānoñ se hai mansūb ḳhudā kī azmat
un makānoñ meñ añdherā nahīñ hone deñge

gayā ġhulāmī kā vo añdherā
āzādī kā huā saverā

bichhā.e rakhiye añdherā har-sū
sitāra koī uchhāl rakhiye

makāñ sargoshiyoñ se gūñjte haiñ
añdherā rauzanoñ se jhāñktā hai

vo hue kyā aañkh se 'ārif' nihāñ
saarī duniyā meñ añdherā chhā gayā

sarhad-e-imkāñ se aage thiiñ yahī tārīkiyāñ
kyā zarūrī hai añdherā har jagah Dastā rahe

raat bhar diip sar-e-rāh jale kis ke liye
kyuuñ añdherā thā bhare ghar meñ qamar se pūchho

raushnī hai kisī ke hone se
varna buniyād to añdherā thā

'shāhid' dayār-e-dil meñ añdherā hai chaar sū
raushan koī charāġh-e-mohabbat na kar sake

din añdherā dikhā.ī detā hai
raat dekhe the jagmagāte ḳhvāb

ḳhirad ke diip bujhe chaar sū añdherā hai
jalāo dil hī jalāo to koī baat bane

ye aadhī raat ye kāfir añdherā
na sotā huuñ na jaagā jā rahā hai

añdherā thā to ye saare shajar kitne akele the
khulī jo dhuup to har peḌ se saaya nikal aayā

'charāġh' ab kaun sī majbūriyāñ haiñ jo añdherā hai
tumhīñ kahte the ki raushan zamāna karne vaalā huuñ

jalā na ghar kā añdherā charāġh se 'mohsin'
sitam na kar mirī jaañ apne yaar belī par

dair o ka.aba meñ jalā.e mirī vahshat ne charāġh
merī mehrāb-e-tamannā meñ añdherā hī rahā

aañkh bikhrī to shab kā añdherā huā
muskurā.ī to pahlā saverā huā

zulf bikhrī to shab kā añdherā huā
muskurā.ī to pahlā saverā huā