Tags-Samundar

'riyāz' Dar hai kahīñ na āñkhoñ kī kashtiyoñ meñ chhupe samundar
jumūd TuuTā hai saarī maujoñ kā aise be-tāb ham hue haiñ

saath sāhil pe guzarte hue dekhī thī kabhī
yaad hai ab bhī samundar meñ utartī huī shaam

saarī duniyā hai siyāhī ke samundar kī tarah
chhīn lī vaqt ne ek ek kiran āḳhir-e-shab

tālāb to barsāt meñ ho jaate haiñ kam-zarf
bāhar kabhī aape se samundar nahīñ hotā

safīne sab ke sab ġharqāb kar ke
samundar āh-o-zārī kar rahā thā

dil dard se bhar bhar aayā palkoñ pe na chamke aañsū
āñkhoñ ne samundar bhar ke qatre ke liye tarsāyā

maiñ chuntā phirtā huuñ kāġhaz ke TukḌe
kitāboñ ko samundar meñ bahā kar

patvār gir ga.ī thī samundar kī god meñ
dil kā safīna phir bhī lahū ke safar meñ thā

biphrī maujoñ se ulajhne kā salīqa hai agar
ye samundar kabhī pāyāb bhī ho saktā hai

ek majzūb udāsī mere andar gum hai
is samundar meñ koī aur samundar gum hai

tujh meñ gar bārish samundar ke barābar hai to kyā
mere andar bhī hai sahrā ke barābar tishnagī

bikherte hue sonā zamīñ meñ chāroñ taraf
ubhar rahā hai samundar se āftāb koī

lazzat-e-dard samundar se nahīñ siip se pūchh
jis kī āġhosh meñ qatre se guhar jaage hai

ḳhalā kā mas.ala hī muḳhtalif hai
samundar is qadar gahrā nahīñ hai

pahle sahrā se mujhe laayā samundar kī taraf
naav par kāġhaz kī phir mujh ko savār us ne kiyā

ghaTā uThī thī kisī tishnagī ke sahrā se
jo qatra qatra samundar kī pyaas chhoḌ ga.ī

misāl-e-mauj samundar kī samt lauT chalo
sukūñ-ba-dosh kināre mujhe qubūl nahīñ

hijr ke kaale samundar kā nahīñ sāhil koī
mauja-e-tūfān-e-dahshat se varā kuchh bhī nahīñ

maiñ Duub jā.ūñ samundar kī tez lahroñ meñ
kināre rakkhī huī kā.enāt rah jaa.e

samundar dasht par but kāTtī hai
musībat ko musībat kāTtī hai