Tags-Samundar

kashtiyāñ kis liye sāhil se bañdhī rahtī haiñ
ho na ho niile samundar meñ koī ġhaar na ho

khārī paanī kī jhīleñ sab bach jā.eñgī
luqma siyāh samundar kā bas dariyā hogā

bhaḌak uThe na samundar kī tishnagī 'rāshid'
mirā lahū bhī sar-e-bādbān rahne de

sāhiloñ kī ret hī se chun rahe ho sīpiyāñ
tum kabhī 'akram' samundar meñ utar kar dekhte

nahīñ hai qatre kī auqāt bhī jinheñ hāsil
vo kam-nazar bhī samundar ke ḳhvāb dekhte haiñ

jis ne ḳhvāboñ meñ samundar dekhe
us kī taqdīr meñ sahrā hogā

kabhī to Duub sahī shaam ke samundar meñ
ki maiñ sadā hī javāhar nikāl laayā huuñ

Duube haiñ vo yuuñ sab ke samundar meñ ki ġham haiñ
sūraj kī chamak aañkh meñ laa.e the jo bhar ke

vo samundar hai to phir ruuh ko shādāb kare
tishnagī kyuuñ mujhe detā hai sarāboñ kī tarah

anā ko liye kab se baiThā hai dariyā
jagah se samundar bhī hiltā nahīñ hai

chashma-e-faiz hai kyā zaat mire saaqī kī
ek qatre ko kahā jis ne samundar paayā

anaar phūTte the niiñd ke samundar meñ
vo dekhtā thā mujhe phuljhaḌī lagā.e hue

sab gahre samundar meñ khaḌe soch rahe haiñ
ham meñ koī sūraj kā parastār nahīñ hai

ik ik kar ke dhuup ke saare surḳh parinde mar jaate haiñ
ret ke zard samundar par jab sūraj paañv dho jaatā hai

vo aañkh sāya-fagan hai dil par jo be-ḳhudī kā hai isti.āra
ghulī huī nīlgūñ samundar meñ tal.at-e-māhtāb jaise

sukh hai ik gumnām ufuq
naav samundar sāhil dukh

ye kaisī baat huī hai ki dekh kar ḳhush hai
vo āñsuoñ ke samundar ke darmiyān mujhe

samundar kī tarah dil thā ye be-kal
ajab halchal mire andar rahī thī

ek aañsū bhī hukūmat ke liye ḳhatra hai
tum ne dekhā nahīñ ā.ankhoñ kā samundar honā

kuchh na tham paayā hai is sail-e-ravāñ ke aage
kaise ashkoñ kā samundar huiiñ āñkheñ merī