Tags-Samundar

uThte hue tūfān kā manzar nahīñ dekhā
dekho mujhe gar tum ne samundar nahīñ dekhā

ḳhvāhishoñ meñ bah gayā kamzor miTTī kā hisār
jism qatre meñ simaT aayā samundar dekh kar

ik samundar hai mirī zaat ke paimāne meñ
Daal rakkhī hai magar us pe ridā sahrā kī

dūriyāñ itnī diloñ meñ to na hotīñ yārab
phail jaate ye jazīre to samundar hote

duniyā ek samundar jis meñ
maiñ huuñ koī jazīra tanhā

tumhārī intihā.eñ ant par be-sūd niklī haiñ
samundar jitnā gahrā utnā khārā ham na kahte the

kisī pyāsī nadī kī bad-duā huuñ
samundar thā magar sahrā huā huuñ

be-kināriyat ke samundar meñ
jahāñ har natīja sifar hai

jaane kyā ramz hai lagtā nahīñ sahrā sahrā
aur samundar bhī samundar nahīñ lagtā mujh ko

ek tārīḳh kī ta.amīr kare vo lamha
ek samundar jo rache buuñd vahī ya.anī maiñ

jazb kar na le 'ja.afar' soch lahr kī tujh ko
tū kahāñ samundar meñ kañkare girātā hai

āshob-e-mohabbat kā aañsū rakhtā hai talavvun fitrat meñ
āñkhoñ meñ rahe to qatra hai Tapke to samundar ho jaa.e

dekhiye kab tak rahe tanhā parinde kī uḌaan
haiñ samundar hī samundar be-karāñ phaile hue

zaḳhm kyuuñ risne lage ik tire chhū lene se
dukh samundar the magar mauja-e-pāyāb bhī the

mire aañsū jo tum jharne se bah jaao
samundar tak pahuñch jā.ūñ isī se

zarā sī mauj par hairān mat ho
yahāñ saarā samundar muḳhtalif hai

chalā thā maiñ to samundar kī tishnagī le kar
milā ye kaisā sarāboñ kā silsila mujh ko

lahūluhān samundar bhī dekhnā hai abhī
burīda halq pe ḳhanjar bhī dekhnā hai abhī

use ḳhayāl-e-dil-e-dostāñ agar aayā
to āñsuoñ kā samundar zarūr niklegā

tamām dost samundar ke paar jaane lage
par ek dil ko to sāhil pe dhar liyā maiñ ne