Tags-Samundar

sher meñ saath ravānī ke ma.ānī bhī to bhar
ai 'sadā' qaid tū kuuze meñ samundar kar de

jidhar bhī dekho samundar yahāñ ġhamoñ kā hai
agar yahī hai jahāñ to jahāñ nahīñ hotā

ab samundar bhī bahut sat.hī hue
ab rahīñ in meñ na vo gahrā.iyāñ

samajh meñ kuchh nahīñ aatā samundar jab bulātā hai
kisī sāhil kā koī mashvara achchhā nahīñ lagtā

māmūl pe sāhil rahtā hai fitrat pe samundar hotā hai
tūfāñ jo Dubo de kashtī ko kashtī hī ke andar hotā hai

maiñ agar hotā zamīñ-zādoñ ke lashkar meñ sharīk
mere raste meñ samundar bhī bhañvar bhī aate

lagī hai shart mere āñsuoñ kī
samundar ko milegī maat ab ke

sahrā kā patā de na samundar kā patā de
achchhā ho ki ab mujh ko mire ghar kā patā de

kar diyā ḳhud ko samundar ke havāle ham ne
tab kahīñ gauhar-e-nāyāb nikāle ham ne

merī TuuTī huī kashtī kā ḳhudā hāfiz hai
duur tak gahre samundar ke sivā kuchh bhī nahīñ

kaun dariyāoñ kī haibat oḌh kar niklā 'najīb'
chīḳh uTThe haiñ samundar meñ bhañvar kis ke liye

anā kyā ijz ko girdāb samjho
baḌā gahrā samundar zaat kā hai

mujhe ye motī samundar yuuñ hī nahīñ detā
vo mere hausle bhī justujū bhī dekhtā hai

ret meñ sīpiyāñ milī haiñ mujhe
kyā samundar thā pahle registān

logo ham chhān chuke jā ke samundar saare
us ne muTThī meñ chhupā rakkhe haiñ gauhar saare

tishnagī merī ajab ret kā manzar niklī
mere hoñToñ pe hue ḳhushk samundar saare

jhūTī aas ke pañkh lagā kar saat samundar uḌ aayā
tere qurb kī ḳhushbū pā kar maiñ sāhil par Duub gayā

haañ maan liyā par bahr kā kyā badle badlī har bahr badalne vaalī hai
jis rau meñ samundar laakh bhare vo rau phir chalne vaalī hai

mujhe to qatra hī honā bahut satātā hai
isī liye to samundar pe rahm aatā hai

terī duniyā ko ujāloñ se sajāne ke liye
dil charāġhoñ sā jalāyā hai samundar maiñ ne