Tags-Samundar

maiñ ne sochā ki satā.egī bahut pyaas mujhe
pī gayā jhoñk meñ bas aa ke samundar saarā

ik samundar hai dil-e-ushshāq meñ
jis meñ har mauj-e-balā maujūd hai

kal talak sahrā basā thā aañkh meñ
ab magar kis ne samundar rakh diyā

samundar aur māñjhī so ga.e haiñ
samundar kā kinārā jāgtā hai

samundar ek Thahrā sā abhī tak hai tire andar
nadī ban kar mirā bahnā tujhe milne kī koshish meñ

maiñ samundar se lagī shor-zamīñ jaisā huuñ
mārtā rahtā hai mujh ko mirā khārā paanī

hijr samundar nahīñ vasl kināra nahīñ
kaun hai kis moḌ par koī ishāra nahīñ

guloñ kā rañg tapish ḳhushbūeñ samundar khīñch
kuchh is tarah se mirī aarzū kā paikar khīñch

yak dam kisī ne ham ko gale se lagā liyā
sahrā se ek pal meñ samundar kiye ga.e

paayā na dil bahāyā huā sail-e-ashk kā
maiñ panja-e-mizha se samundar bilo chukā

aisī pyaas kī shiddat hai ki maiñ ye duā.eñ kartā huuñ
jitne samundar haiñ duniyā meñ sab kī bārish ho jaa.e

samundar kī tah meñ
samundar kī sañgīn tah meñ

samundar kī maujoñ ko chhū kar havā.eñ palaTne lagī haiñ
sitāra falak par kahīñ chal rahā hai diyā jal rahā hai

pyaas bujhtī hai kahāñ tishna-laboñ kī is se
paanī kahne ko samundar meñ bahut hotā hai

sadaf āsūdgī kī niind so.e
magar pyāse samundar jāgte haiñ

aañkh khul jaa.e to sahrā kī zamīñ par hoñ qadam
niiñd aa jaa.e to ḳhvāboñ meñ samundar dekheñ

jis ko chhupā ke dil meñ samundar ne rakh liyā
bādal ke muñh se aao vahī dāstāñ suneñ

jharnoñ kī kyā bisāt kareñ guftugū 'fahīm'
dariyā gire jahāñ vo samundar rahe haiñ ham

chāñd nashe meñ thā
aur samundar se

kitnā hī be-kanār samundar ho phir bhī dost
rahtā hai be-qarār nadī ke milāp ko