Tags-Samundar

nigal ga.e sab kī sab samundar zamīñ bachī ab kahīñ nahīñ hai
bachāte ham apnī jaan jis meñ vo kashtī bhī ab kahīñ nahīñ hai

ahd-e-'ġhālib' se ziyāda hai mire ahd kā karb
ab to kuuze meñ samundar bhī nahīñ aane kā

bahut uktā gayā hai be-sukūnī se vo apnī
samundar jhiil ke nazdīk aanā chāhtā hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ahl-e-kashtī ko to sāhil ke hī ḳhvāb aate haiñ
taktā rahtā hai safīnoñ ke samundar chehre

tanhā sāhil ḳhvāb gharauñdā aas jazīra merā hai
niilā bādal saat samundar pāñch zamīneñ terī haiñ

ek majzūb udāsī mere andar gum hai
is samundar meñ koī aur samundar gum hai

khulā ye raaz chashm-e-tar se mujh par
samundar se fuzūñ paanī hai mujh meñ

koī dariyā na samundar na sarāb
tishnagī bol kidhar jaanā hai

mahfūz hamīñ reg-hisāroñ meñ hue the
kyā varna samundar kā guzar mauj-e-havā kyā

Duub jā ishq ke samundar meñ
rāste dil ke to vahāñ se mile

ham se kahtā thā ye nādīda zamīnoñ kā safar
kahīñ sahrā to kahīñ niilā samundar hogā

yā samundar se mirī ḳhaak judā kar 'shāhid'
yā banā de mujhe tairāk mirī izzat rakh

gopī-chandar Duub gayā
sahmā harā samundar chup

jahāzī qāfila Duubā thā pahle
samundar ba.ad meñ uupar uThā thā

bahte hue do badan samundar
hoñToñ ke kināre aa lage haiñ

badan ko chaaT liyā hai siyāh kaa.ī ne
abhī to kitne samundar haiñ paar karne ko

thā misālī jo zamāne meñ samundar kā sukūt
kaun tūfān uThātā rahā sāhil ke sivā

samundar aur sāhil pyaas kī zinda alāmat haiñ
unheñ maiñ tishnagī kī had ko bhī chhū kar banātī huuñ

kahīñ na sab ko samundar bahā ke le jaa.e
ye khel ḳhatm karo kashtiyāñ badalne kā