Tags-Sardi

kohrā kohrā sardī hai kaañp rahā hai puurā gaañv
din ko taptā sūraj de raat ko kambal de mālik

tum to sardī kī hasīñ dhuup kā chehra ho jise
dekhte rahte haiñ dīvār se jaate hue ham

ab kī sardī meñ kahāñ hai vo alaav siina
ab kī sardī meñ mujhe ḳhud ko jalānā hogā

december kī sardī hai us ke hī jaisī
zarā sā jo chhū le badan kāñptā hai

aisī sardī meñ shart chādar hai
oḌhne kī ho yā bichhaune kī

ḳhauf kahāñ mere dil meñ
ye sardī kā lahrā hai

mire sūraj aa! mire jism pe apnā saaya kar
baḌī tez havā hai sardī aaj ġhazab kī hai

jazbe kī sab garmī sardī bahte ashkoñ kī barsāt
ham ne saare mausam dekhe ham par guzre sab hālāt

allāh ġharīboñ kā madad-gār hai 'rānā'
ham logoñ ke bachche kabhī sardī nahīñ khāte

aisī sardī meñ shart chādar hai
oḌhne kī ho yā bichhaune kī

chāhiye hai kabhī relā bhī mujhe sardī kā
aur kabhī dhuup kā lashkar bhī mujhe chāhiye hai

ek soft-drink kī qīmat meñ
december kī sardī meñ

shaam hone se pahle hī
sardī ke tez reze

itnī sardī hai ki maiñ bāñhoñ kī harārat māñgūñ
rut ye mauzūñ hai kahāñ ghar se nikalne ke liye

sardī bhī ḳhatm ho ga.ī barsāt bhī ga.ī
aur is ke saath garmi-e-jazbāt bhī ga.ī

ye kaisī vādī-e-ġhurbat se vābasta hue ham log
jahāñ sardī meñ sūraj bhī bahut kam-kam nikaltā hai

muflis kī to majbūrī hai sardī garmī bārish kyā
roTī kī ḳhātir saare ġham sahte haiñ to sahne do

kabhī kabhī is pighalte lohe kī garm bhaTTī meñ kaam karte,
ThiThurne lagtā hai ye badan jaise saḳht sardī meñ bhun rahā ho,

ḳhāmoshī se jhel rahī hai garmī sardī har mausam kī
majbūrī kī chādar oḌhe ek anā hai mere andar

sardī aur garmī ke uzr nahīñ chalte
mausam dekh ke sāhab ishq nahīñ hotā