Tags-Sawal

savāl ye nahīñ ḳhanjar hai kin ke hāthoñ meñ
savāl hai ki ishāra kahāñ se miltā hai

hijr-o-visāl-o-ranj-o-ġham hasrat-o-yās-o-ārzū
har shai ubhar ke aa ga.ī mub.ham se ik savāl meñ

vahī shahr hai shahr ke log vahī ġham-e-ḳhanda o sañg o salīb vahī
yahāñ aa.e haiñ kaun se aise saḳhī ki jo lutf-e-suḳhan kā savāl kareñ

azal se tā-ba-abad koshish-e-javāb hai 'shāz'
vo ik savāl jo mub.ham rahā hai āñkhoñ meñ

ḳhayāl-e-yaktā meñ ḳhvāb itne
savāl tanhā javāb itne

maiñ ek patthar sahī magar har savāl kā bāz-gasht ban kar javāb dūñgā
mujhe pukāro mujhe sadā do

koī kare na ġhaur to us kā qusūr hai
ik ik javāb varna hai ik ik savāl meñ

amal se apnī zabāñ kis tarah na ho be-kār
jahāñ ho rasm savāl-o-javāb āñkhoñ meñ

agar mohabbat meñ saare rishtoñ kī azmateñ haiñ
to dushmanī kā savāl kyuuñ hai ye sochtā huuñ

āshnāoñ se savāl-e-āshnā.ī kar ke dekh
phir pata chal jā.egā hai kaun kitnā ajnabī

qāsid nahīñ ye vaqt savāl-o-javāb kā
ab haal ġhair hai dil-e-ḳhāna-ḳharāb kā

hamāre azm-e-safar ke aage savāl-e-lail-o-nahār kyā hai
ġham-e-mohabbat uThā liyā hai to gardish-e-rozgār kyā hai

'ziyā' kisī se savāl pūchho
to zehn meñ tum javāb rakhnā

ai dost aa ke dekh le ishq kā ye kamāl bhī
tū hī mirā javāb hai tū hī mirā savāl bhī

mohlat kise mile hai yahāñ lab-kushā.ī kī
āñkhoñ meñ naach naach ke thakte rahe savāl

guzrā 'asad' masarrat-e-paiġhām-e-yār se
qāsid pe mujh ko rashk-e-savāl-o-javāb hai

ho gayā pā.emāl āñkhoñ meñ
mar gayā ik savāl āñkhoñ meñ

masjidoñ meñ sab jam.a ho jā.eñge ḳhurd-o-kalāñ
duur ho dil kī kudūrat ye savāl-e-eid hai

samajh sake na jise koī bhī savāl aisā
bunā hai saañs ke dhāgoñ ne ek jaal aisā

kuchh kaTī himmat-e-savāl meñ umr
kuchh umīd-e-javāb meñ guzrī