Tags-Sawal

kured kar mere zaḳhmoñ ko yuuñ savāl na kar
tujhe ḳhabar hai to phir mujh se pūchhtā kyā hai

koī savāl-e-ḳhudā-o-sanam nahīñ ai dost
maiñ kyā karūñ mirī gardan meñ ḳham nahīñ ai dost

dekhtī kyā hai ai nigāh-e-karam
mere dast-e-savāl meñ kyā hai

jo merī bātoñ ko māntā thā bilā-ta.āmul
suno use ab savāl karne bhī aa ga.e haiñ

shab-e-vasl dekh ke ḳhvāb meñ maiñ paḌā thā saḳht azaab meñ
the hazār soch javāb meñ ajab us kā mujh se savāl thā

chehre ko tere dekh ke ḳhāmosh ho gayā
aisā nahīñ savāl tirā lā-javāb thā

nādim āñkheñ soch rahī haiñ kal tārīḳh savāl karegī
itnā qaht-e-mohabbat kyuuñ thā kyā asbāb likhe jā.eñge

kartā huuñ savāl jis ke dar par
aatī hai yahī sadā ki phir maañg

gadā nahīñ haiñ ki dast-e-savāl phailā.eñ
kabhī na aap ne pūchhā ki aarzū kyā hai

na koī rañj un āñkhoñ meñ thā dam-e-ruḳhsat
na thī zabān meñ luknat savāl karte hue

kabhī ḳhudā kabhī ḳhud se savāl karte hue
maiñ jī rahā huuñ musalsal malāl karte hue

amīr-e-shahr ke hoñToñ pe paḌ ga.e taale
ġharīb-e-shahr kā chubhtā savāl aisā thā

ye bazm-e-chashm-o-lab hai mirī jaañ abhī na jā
baḌhne de rābte ye savāl-o-javāb ke

mire nukta-dāñ tirā fahm apnī misāl hai
maiñ huuñ ek saada savāl koī javāb de

mere savāl-e-vasl par aaj vo mujh se kah ga.e
tū abhī chand roz aur hijr meñ aah aah kar

taslīm kī sirisht bas ījāb aur qubūl
saare savāl jur.at-e-inkār se uThe

muñh chhupā.e javāb phirte haiñ
sar uThā kar khaḌe hue haiñ savāl

ham ne in aalī bināoñ se kiyā akasr savāl
āshkārā jin se un ke bāniyoñ kā hai jalāl

bijlī girā.eñ tuur par āvāz hī se vo
Thahre kabhī to ham se savāl-o-javāb kī

har shaam ye savāl mohabbat se kyā milā
har shaam ye javāb ki har shaam ro paḌe