Tags-Sawal

us kī ma.asūm nigāhoñ meñ na thā jis kā javāb
mere hoñToñ pe vahī harf-e-savāl aayā kyuuñ

kyā phir kisī ne qarz-e-muravvat adā kiyā
kyuuñ aañkh be-savāl hai dil phir dukhā hai kyā

mujh se hī ho ga.ī hai savāl-e-vafā kī bhuul
duniyā ko lā-javāb samajhne lagā thā maiñ

ye dekh ki tere sāmne kaun
sar-tā-pā savāl ho gayā hai

mere lab par savāl aayā hai
terī āñkheñ javāb ho jaa.eñ

pās-e-adab hai kyā uThe aañkh is ke rū-ba-rū
is meñ savāl-e-jur.at-e-rindāna to nahīñ

tirī thakī huī ā.ankhoñ meñ ḳhvāb thā ki nahīñ
mire savāl kā koī javāb thā ki nahīñ

andar to ḳhayāloñ ke ho aa.e ḳhayāl apnā
ifshā-e-haqīqat se Dartā hai savāl apnā

javāb is savāl kā bhī de zarā mujhe
uḌā ke laa.ī hai yahāñ pe kyuuñ havā mujhe

kaise kaise savāl kartā hai
ek pāgal tirī hirāsat meñ

maiñ ne to ik savāl pūchhā thā
us ne kar dī javāb kī bārish

qalb-e-hayāt-o-maut se mil na sakā koī javāb
pheñkā kiye haiñ garche ham sañg-e-savāl har taraf

un kā ḳhayāl har taraf un kā jamāl har taraf
hairat-e-jalva rū-ba-rū dast-e-savāl har taraf

kise dekhte kise pūchhte ki ham aap kushta-e-hāl the
sar-e-lab kuchh aur the mas.ale pas-e-jāñ kuchh aur savāl the

chehre ko tere dekh ke ḳhāmosh ho gayā
aisā nahīñ savāl tirā lā-javāb thā

har ik savāl pe to muskurā ke rah jaa.e
hameñ to ek hī jaisā tirā javāb lage

jab chalī ai ziist mustaqbil kī baat
ban gayā huuñ aap ḳhud apnā savāl

savāl ye hai ki aapas meñ ham mileñ kaise
hamesha saath to chalte haiñ do kināre bhī

hai iḳhtiyār hameñ kā.enāt par hāsil
savāl ye hai ki ham kis ke iḳhtiyār meñ haiñ

sahar ko shaam samajhnā jo bas kī baat nahīñ
yahī savāl uThāo ki raushnī kam hai