Tags-Sawal

mujhe le ke chalnā hai le ke chal par use bhī le le tū saath meñ
mujhe kar na pā.egā tū bayāñ maiñ savāl huuñ vo javāb hai

zād-e-rāh kā ham se kyuuñ savāl karte ho
rahzanoñ ke narġhe meñ jab hameñ utārā hai

taḌap rahe haiñ zabāñ par ka.ī savāl magar
mire liye koī shāyān-e-iltimās nahīñ

hai dukān-e-shauq bharī huī koī mehrbāñ ho to le ke aa
zar dāġh-e-dil kā savāl hai koī naqd-e-jāñ ho to le ke aa

vo is liye mire pahlū meñ baiThte hī nahīñ
ki ye kahīñ na savāl-e-visāl kar baiThe

savāl-e-vasl pe uzr-e-visāl kar baiThe
vo kis ḳhayāl se aisā ḳhayāl kar baiThe

ye zindagī to musalsal savāl kartī hai
magar javāb vahī ḳhāmushī Thahartī hai

ai zauq arz-e-hunar harf-e-e'tidāl meñ rakh
maiñ ik javāb huuñ mujhī ko mire savāl meñ rakh

javāb de diyā us ne savāl kā mere
magar javāb meñ phir ik savāl hai us kā

sun kar savāl-e-vasl vo 'jauhar' se kahte haiñ
kuchh baat ho to aa.e hamāre ḳhayāl meñ

na jaane kaun kahāñ kyā savāl kar baiThe
ġhubār-e-rāhguzar apne saath mat karnā

'mohsin' bure dinoñ meñ nayā dost kaun ho
hai jis kā pahlā qarz usī se savāl kar

ye nafsiyātī marīzoñ kā shahr hai 'qaisar'
koī savāl uThāoge maare jāoge

tirā javāb mire kaam kā nahīñ hai ab
ki maiñ to bhuul chukā huuñ savāl vaise hī

har zehn meñ hamesha sulagtā hai ye savāl
āḳhir huā vo kyuuñ jise honā kabhī na thā

ham ḳhud se savāl kar rahe the
lo DhūñD liyā javāb ham ne

jabki merā savāl sīdhā thā
phir bhī ulTā javāb thā us kā

savāl ban ke rū-ba-rū khaḌī huī thī zindagī
mirā lahū nichoḌ kar javāb koī le gayā

us se kyā koī kare aag bujhāne kā savāl
vo to jazbāt meñ bas aag lagānā chāhe