Tags-Sawal

ye kab talak yuuñ hī nafrat kā khel kheloge
maiñ leaderoñ se yahī ik savāl kartī huuñ

vafā kī raah meñ aise kamāl kartī huuñ
na koī shikva na koī savāl kartī huuñ

javāb DhūñDne niklā jo kal mirā maazī
laboñ pe haal ke is ko na.e savāl mile

rāste ḳhatm ho chuke the magar
vāpsī kā koī savāl na thā

vo mujh se pūchhne lagā mere savāl ab
aur maiñ bhī de rahā huuñ jo is ke javāb the

kuchh kahe an-kahe savāl karūñ
aur yuuñ phir se āzmā.ūñ tujhe

gumāñ huā hai ye amboh se javāboñ ke
savāl ḳhud hī javāb-e-savāl hai shāyad

hamārī tarah sadā ik uchhāl kar dekho
javāb kuchh na milegā savāl kar dekho

jhoñkā ye kis ke lams-e-gurezāñ kī tarah thā
ab hal hī karte rahiye havā ke savāl ko

javāb-e-ḳhvāb bhalā ḳhvāb ke sivā kyā hai
magar vo niklā nahīñ hai savāl se aage

mirā vajūd havāla tirā huā āḳhir
to khā gayā nā mujhe tū mire savāl-e-qadīm

dostī meñ hai bajā 'pankaj' savāl-e-shauq bhī
hotī hai yaarī magar qurbān jaane ke liye

lo terī chaukhaT pe zindagī kā maiñ faisla ab ke le rahī huuñ
tū mere dast-e-savāl par ab koī na koī javāb likhnā

aisoñ se tark-e-mai kā 'mubārak' savāl kyā
tauba kī tujh se rind-e-qadah-ḳhvār kyā kaheñ

tamām umr-e-ravāñ kā maal hairat hai
javāb jis kā nahīñ vo savāl hairat hai

hamīñ the us ke javāboñ ke muntazir 'rāhat'
so baar baar hamīñ se koī savāl huā

haañ kahte kahte guñg na ho jaa.e dil kahīñ
yārab mirī zabān ko tāb-e-savāl de

savāl karte haiñ mujh se kyā kyā pa.e-ḳhudā mere rāhbar aa
paḌā maiñ taktā huuñ terā rasta nakīr-o-munkir khaḌe hue haiñ

savāl raah badalne kā hai to tum badlo
mirī dalīl hai vāzeh misāl raushan hai

vo ek fikriya lamha usī tarah hai abhī
tire javāb se merā savāl raushan hai