Tags-Sawal

bahut sī bāteñ zabāñ se kahī nahīñ jātīñ
savāl kar ke use dekhnā zarūrī hai

vo ḳhud pilā.eñ maiñ na piyūñ merī kyā majāl
is meñ savāl-e-sub.h hai kyā zikr-e-shām kyā

savāl nasl ke hoñ yā zabān-o-maz.hab ke
savāl san.at-o-hirfat ke yā ma.īshat ke

koī talab thī to dast-e-savāl phailāte
magar milī thī kahāñ sūrat-e-gadā.ī bhī

maiñ kab se apnī talāsh meñ huuñ milā nahīñ huuñ
savāl ye hai ki maiñ kahīñ huuñ bhī yā nahīñ huuñ

pahle pūchho savāl apne ta.iiñ
phir ḳhalā se talab javāb karo

varaq varaq zā.ichoñ meñ tahrīr ek se the javāb lekin
savāl chakhne kī ḳhaam ḳhvāhish meñ ham ne kyā kyā azaab chakkhe

ḳhvāja ke dar se koī bhī ḳhālī nahīñ gayā
aayā hai itne duur to 'alvī' savāl kar

ye savāl kyuuñ ye ḳhayāl kyā hai vafā to is kā ma.aal kyā
yahī zikr vird-e-zabāñ rahā yahī fikr dil ko lagī rahī

maiñ lafz lafz meñ tujh ko talāsh kartā huuñ
savāl meñ nahīñ aatā na aa javāb meñ aa

kuchh kaTī himmat-e-savāl meñ umr
kuchh umīd-e-javāb meñ guzrī

tirī aarzū se bhī kyuuñ nahīñ ġham-e-zindagī meñ koī kamī
ye savāl vo hai ki jis kā ab koī ik javāb nahīñ rahā

noch pheñke laboñ se maiñ ne savāl
tāqat-e-shoḳhī-e-javāb nahīñ

maiñ us ke hijr meñ kyuuñ TuuT kar nahīñ royā
ye ik savāl bhī us kī taraf se hotā hai

javāb detā hai mere har ik savāl kā vo
magar savāl bhī us kī taraf se hotā hai

na ḳhud ko bechā na koī ḳhushāmadeñ kī haiñ
to kaise tum pe ye 'bekal' savāl hone lagā

javāb de na sakoge palaT ke maazī ko
ik ek lamha vo chubhte savāl pūchhegā

maiñ bhī ab ḳhud se huuñ javāb-talab
vo mujhe be-savāl chhoḌ gayā

maiñ karūñ phir koī savāl nayā
aur phir us ko lā-javāb karūñ

rah-e-vafā meñ hameñ jitne ham-ḳhayāl mile
un hī kī āñkhoñ meñ ham ko ka.ī savāl mile