Tags-Sawal

is ik savāl kā sūraj bhī de sakā na javāb
maiñ sirf saaya nahīñ ruup huuñ magar kis kā

javāb de ga.iiñ saarī zihānateñ 'sālim'
kisī savāl ne tā-umr lā-javāb kiyā

hamāre ho to zarā khul ke e'timād karo
nayā savāl uThāte ho kyuuñ javāb ke saath

vo the javāb ke sāhil pe muntazir lekin
samay kī naav meñ merā savāl Duub gayā

dene hoñge javāb āḳhir-kār
tujh ko mere savāl khīñcheñge

dast-e-savāl-e-barg hai shabnam se kyuuñ tahī
jo bādaloñ ko luuT le vo zor kyuuñ nahīñ

savāl ye hai ki aapas meñ ham mileñ kaise
hamesha saath to chalte haiñ do kināre bhī

majlis meñ us kī ab to darbār sā lage hai
us kā savāl guzrā us kā savāl guzrā

junūñ kī fitrat-e-ālī pe baar hai ai dost
vo bandagī jo maqām-e-savāl se guzre

dil hai mirā ki mārka-e-kufr-o-dīñ koī
ik umr kaT ga.ī hai javāb o savāl meñ

ma.ashūq jā-e-hūr mile mai bajā.e aab
mahshar meñ do savāl kareñge ḳhudā se ham

mujhe deñgī ḳhaak tasalliyāñ tirī jāñ-gudāz tajalliyāñ
maiñ savāl-e-shauq-e-visāl huuñ to jalāl-e-sho.ala-e-tūr hai

aaj tak ehsās kī chilman se uljhā hai ye mub.ham sā savāl
us ne āḳhir kyuuñ bunā thā bahkī nazroñ se hasīñ chāhat kā jaal

bujhte hue mire ḳhayāl jin meñ hazār-hā savāl
phir se bhaḌak ke ruuh meñ phail ga.e haiñ chār-sū

junūn-e-shauq kī takmīl ho na ho phir bhī
kisī ke pesh-e-nazar ishq kā savāl to hai

maiñ apne saare savāloñ ke jāntā huuñ javāb
mirā savāl mire zehn kī sharārat hai

yahī savāl nahīñ hai faqat ki ham kyā haiñ
ye kā.enāt hai kyā aur zindagī kyā hai

jī chāhtā hai phir koī tujh se karūñ savāl
terī nahīñ nahīñ ne ġhazab kā mazā diyā

nigāh mujh se milāne kī un meñ taab nahīñ
mere savāl kā shāyad koī javāb nahīñ

us kā javāb ek hī lamhe meñ ḳhatm thā
phir bhī mire savāl kā haq der tak rahā