Tags-Sawal

aarzū merī na puurī ho koī baat hai ye
kaash itnā vo samajh leñ ki savāl achchhā hai

jo na nikle kabhī dil se vo tamannā achchhī
jo na aa.e kabhī lab tak vo savāl achchhā hai

ḳhud-ba-ḳhud aañkh badal kar ye savāl achchhā hai
roz kab tak koī pūchhā kare haal achchhā hai

ab nashāt-e-ġham-e-furqat se savāl itnā hai
tāziya-dārī kī lazzat bhī chalī jaa.e agar

phir ik savāl hai bedār shab ke āñgan meñ
jo ḳhud hī jaag rahā ho udaas bistar par

is imtihāñ ke savāl aate nahīñ nisāboñ se maktaboñ ke
ajiib āshiq hai ye jo paḌh kar kitāb tayyār ho rahā hai

savāl tujh se shab-o-roz merā chaltā rahā
javāb terā havāoñ meñ mujh ko miltā rahā

mire haal ko na behāl kar
mirā tujh se bas ye savāl hai

vo merī ḳhvāhish kī lauh-e-tishna pe zindagī ke savāl ubharnā
vo us kā harf-e-karam se apne qubūliyat ke javāb likhnā

sunā rahā huuñ nakīrain ko fasāna-e-hijr
savāl un ke judā haiñ mire javāb judā

kār-e-junūñ kī hālateñ, kār-e-ḳhudā ḳhayāl kar
ishq kā maiñ javāb huuñ, aur koī savāl kar

savāl phir se hai kirdār ko badalne kā
maiñ ab kī baar bhī kapḌe badalnā chāhtā huuñ

ḳhud-baḳhud hal ho ga.e kitne savāl
vaqt ke ḳhāmosh afsāne ke saath

mujhe bhī yuuñ to baḌī aarzū hai jiine kī
magar savāl ye hai kis tarah jiyā jaa.e

kartā huuñ ahl-e-jubba-o-dastār se savāl
gustāḳh ho gayā huuñ mujhe maar dījiye

zamāna jis ke ḳham-o-pech meñ ulajh jaa.e
hamārī zaat ko aisā savāl honā hai

baḌī ghuTan hai
savāl-e-hastī to hāñpte haiñ

sab hai tere savāl meñ pinhāñ
kuchh nahīñ hai mire javāboñ meñ

sab us kī bazm meñ the mujrmoñ kī tarah ḳhamosh
ham aa ga.e to hamīñ se savāl hone lagā

mirā vajūd bhī kyā kuchh ḳhudā se miltā hai
savāl-e-shak se hai begāna merī hastī kyuuñ