Tags-Sawal

maiñ ne bhī chalte chalte kiyā thā yūñhī savāl
kyā ho gayā jo aap ne puurā nahīñ kiyā

haiñ saare jurm jab apne hisāb meñ likhnā
savāl ye hai ki phir kyā javāb meñ likhnā

tirī aarzū se bhī kyuuñ nahīñ ġham-e-zindagī meñ koī kamī
ye savāl vo hai ki jis kā ab koī ik javāb nahīñ rahā

savāl karte haiñ aksar mire adū 'sājid'
ki is nagar meñ koī āshnā milā ki nahīñ

hai mujhe bād-az-savāl-e-bosa ḳhvāhish vasl kī
ye tamannā ek is saa.il ke dil meñ aur hai

Kashkol-e-zāt le ke na jā.ūñ maiñ dar-ba-dar
hājat-ravā ho sab kā vo dast-e-savāl de

sauñpoge apne ba.ad virāsat meñ kyā mujhe
bachche kā ye savāl hai gūñge samāj se

munkashif hone lage jab se rumūz-o-asrār
kuchh savāl ab dil-e-ma.asūm ajab pūchhe hai

savāl kartī ka.ī āñkheñ muntazir haiñ yahāñ
javāb aaj bhī ham soch kar nahīñ aa.e

kahāñ talak koī dast-e-karam ko zahmat de
tamām-shahr hī dast-e-savāl rakhtā hai

saare javāb de na sake zindagī ke ham
kitne savāl dīda-e-tar hī meñ rah ga.e

savāl kā javāb bhī savāl hī se degā tū
jhamelā-sāz maiñ tire sarāb se nikal ga.ī

jo karam pe tum ho maa.il to ye shaan hai tumhārī
na savāl kyuuñ karūñ maiñ ki savāl merī ḳhū hai

kyuuñ vo savāl-e-vasl kā dete nahīñ javāb
hājat hai un ke qufl-e-dahan ko kalīd kī

jitnā suljhāoge aur uljhoge
vaqt kā ik baḌā savāl huuñ maiñ

merī jānib uThī thī koī nigah
ek mub.ham savāl thī kyā thī

jo bhiik māñgte hue bachche ke paas thā
us kāsa-e-savāl ne sone nahīñ diyā

tum ne jo bhī savāl ham se kiye
vo savāl imtihāñ ke the hī nahīñ

iz.hār-e-hāl ke liye sūrat savāl hai
hai guftugū se kaam na ham ko zabāñ se rabt

ḳhabar na thī ki zaat se karūñgā jab mukālima
to har javāb par koī nayā savāl aa.egā