Tags-Sawal

ye ik savāl hai shikva nahīñ gila bhī nahīñ
mire ḳhudā tirā lutf-o-atā hai kis ke liye

jo bevafā.ī ko apnā hunar samajhtā hai
ham us ke aage vafā kā savāl kyā rakhte

tū merī tishna-labī par savāl kartā hai
samundaroñ pe banāyā thā apnā ghar maiñ ne

is ek soch meñ gum haiñ ḳhayāl jitne haiñ
javāb utne nahīñ haiñ savāl jitne haiñ

mujhe kis tarah na ḳhayāl ho ki na 'anjum' un ko malāl ho
kisī baat kā jo savāl ho nahīñ utnī apnī majāl hī

maiñ savāl-e-vasl huuñ kar rahā vo ye kahtā hai ki na mānūñgā
ye ajab tarah kā hai maḳhmasa ki na hijr hai na visāl hī

us bhiiḌ meñ savāl mirī zindagī kā thā
dastār thāme haath meñ tū bhī guzar gayā

vaañ hai savāl har dam rakhiye milāp kam kam
hairān haiñ ki deñ ham is kā javāb kyuuñ kar

haar jaatā maiñ ḳhushī se ki vafā kā thā savāl
jiit jaatī vo agar shart lagātī mujh se

guzrī savāl-e-vasl ke chakkar meñ saarī umr
fursat na mil sakī use guft-o-shunīd kī

dād-e-haq dekhā to mutlaq niiñ hai muhtāj-e-savāl
hai vahāñ baḳhshish hī baḳhshish be-navā.ī chāhiye

na savāl-e-vasl na arz-e-ġham na hikāyateñ na shikāyateñ
tire ahd meñ dil-e-zār ke sabhī iḳhtiyār chale ga.e

vo boltā hai pahāḌoñ kī oT se aksar
kisī pahāḌ se us kā savāl kar dekho

savāl karte haiñ rah-rah ke mujh se lail-o-nahār
maiñ apnī zaat se kyuuñ bad-gumān ban baiThā

tere karam pe jī rahī kab se hai merī kaj-ravī
koī javāb ab nahīñ koī savāl ab nahīñ

mai-kade ke faqīr ai saaqī
kab kisī se savāl karte haiñ

baat hotī hai aap kī lekin
log mujh se savāl karte haiñ

savāl-e-dīd pe tevrī chaḌhā.ī jaatī hai
majāl-e-dīd pe bijlī girā.ī jaatī hai

ik savāl aisā hai mere paas jis ke sāmne
ye jo terī shiddat-e-inkār hai be-kār hai

vīrānī-e-hayāt ko phir tuul dījiye
ye merī zindagī kā muqaddam savāl hai