Tags-Sawal

javāb detā hai mere har ik savāl kā vo
magar savāl bhī us kī taraf se hotā hai

terī dahlīz pe jhukne kā savāl aayā thā
maiñ zamāne kī anāoñ se ulajh baiThā huuñ

sūrat-e-savāl huuñ maiñ pūchho na merā matlab
maiñ apne mudda.ā kī tasvīr hū-ba-hū huuñ

tanhā kar ke mujh ko salīb-e-savāl pe chhoḌ diyā
maiñ ne bhī duniyā ko us ke haal pe chhoḌ diyā

ik ye savāl hal nahīñ hotā visāl meñ
kitnā qarīb aa ga.e kitnā samajh liyā

mujhe dard aisā hai chāragar yahī pūchh bas ke kahāñ nahīñ
ye yahāñ vahāñ kā savāl kyā ki jigar meñ mere sharār hai

sach kahūñ to javāb rakkhā hai
aap hī ke savāl meñ ai dost

kitnā mushkil huā javāb mujhe
kitnā āsān thā savāl us kā

maiñ lafz lafz meñ tujh ko talāsh kartā huuñ
savāl meñ nahīñ aatā na aa javāb meñ aa

maiñ ne kahā ye un se jab aa.e vo vaqt-e-naz.a
hai āḳhirī savāl mirā maan jā.iye

kis ke savāl par ye dil rotā hai saarī saarī raat
kaun habīb hai mirā tere ḳhayāl ke sivā

is but-kade meñ ma.anī kā kis se kareñ savāl
aadam nahīñ hai sūrat-e-ādam bahut hai yaañ

hamāre paas thā kyā aur matā-e-dil ke sivā
tire savāl pe vo bhī ḳhushī ḳhushī de dī

ham mai-kashoñ ne nashshe meñ aise kiye savāl
dam band kar diyā sar-e-mimbar-ḳhatīb kā

na safar ba-shart-e-ma.āl hai na talab ba-qaid-e-savāl hai
faqat ek serī-e-zauq ko maiñ bhaTak rahā huuñ kahāñ kahāñ

rukā javāb kī ḳhātir na kuchh savāl kiyā
magar ye zo.am ki har rābta bahāl kiyā

kyā hai is dil kā haal mat pūchho
ham se nāzuk savāl mat pūchho

āmādgī ko vasl se mashrūt mat samajh
ye dekh is savāl pe sanjīda kaun hai

ham ne sochā thā javāb aa.egā
ek behūda savāl aayā hai

ḳhushbū se kis zabān meñ bāteñ kareñge log
mahfil meñ ye savāl tujhe dekh kar huā