Tags-Sawal

savāl dil kā shām-e-ġham ko aur udaas kar gayā
tire vajūd meñ jo ek maiñ thā vo kidhar gayā

tire ġhurūr mire zabt kā savāl rahā
bikhar bikhar ke tujhe chāhnā kamāl rahā

savāl pūchhne vaalo tumheñ bhī āḳhir-e-kār
rahīn-e-minnat-e-bār-e-javāb honā hai

husn sau baar chup rahe lekin
ishq phir bhī savāl kartā hai

kaash us ke rū-ba-rū na kareñ mujh ko hashr meñ
kitne mire savāl haiñ jin kā nahīñ javāb

tumhārī bazm se jab bhī uThe to hāl-zada
kabhī javāb ke maare kabhī savāl-zada

javāb aa.e na aa.e savāl uThā to sahī
phir is savāl meñ pahlū na.e savāl ke rakh

savāl yaar se kaisā kamāl-e-ulfat kā
ki ibtidā bhī to hai shart intihā ke liye

baiThe baiThe koī ḳhayāl aayā
zinda rahne kā phir savāl aayā

ajiib log haiñ us par savāl karte haiñ
kabhī to socheñ ki āḳhir vo ġham-zada kyuuñ hai

ye dekh ab savāl-e-baqā-e-yaqīn hai
TuuTe hue gumān kī ma.asūmiyat na dekh

bādshāhā tirī hai sardārī
maiñ karūñgī savāl na sā.īñ

be-qusūr aaheñ
kar rahīñ savāl

be-āb-o-giyāh bāñjh dhartī
mujh se ye savāl kar rahī hai

jhaTak ke haath chalā hai baḌī hī ujlat meñ
zarā Thahar ki zarūrī savāl rah gayā hai

ik savāl-e-vasl par do do sazā.eñ diiñ mujhe
teġh se kaaTā zabāñ ko sī diye lab tiir se

savāl hai ġham-e-hastī ke biit jaane kā
ye zindagī to bahar-hāl biit jaatī hai

zamāna badlā to iblīs ko malāl huā
milā jo mauqa to bhagvān se savāl huā

guzār dī hai yuuñ hī joḌte ghaTāte hue
savāl hal na hue aur bhar gayā kāġhaz

na vo āh-e-ġham na vo chashm-e-nam na vo laġhzisheñ haiñ qadam qadam
na vo kashmakash hai javāb meñ na vo valvale haiñ savāl meñ