Tags-Sawal

dar-e-mohabbat kā ik gadā huuñ parī kā tālib na huur kā huuñ
tujhī ko tujh se maiñ chāhtā huuñ bas aur merā savāl kyā hai

tujhī ko jaanā tujhī ko maanā tujhī pa dī jaan ġhā.ebāna
chhupā nahīñ kuchh mirā fasāna ye ab javāb-o-savāl kyā hai

ḳhudī ko aa ga.ī hañsī umiid ke savāl par
añdhere tilmilā uThe charāġh kī majāl par

kyā kyā savāl merī nazar pūchhtī rahī
lekin vo aañkh thī ki barābar jhukī rahī

ye bhī nahīñ ki dast-e-duā tak nahīñ gayā
merā savāl ḳhalq-e-ḳhudā tak nahīñ gayā

zabāñ pe aayā na harf-e-matlab ki kah ga.iiñ kuchh sharīr nazreñ
savāl karne na paa.e haiñ ham ki mil gayā hai javāb pahle

āñkheñ laḌā ke un se ham aafat meñ paḌ ga.e
palkoñ kī har zabān pe dil kā savāl hai

savāl-e-vasl par lillāh aaj haañ kah de
dahan se tere nikaltā rahā mudām nahīñ

saarī ta.abīreñ haiñ us kī saare ḳhvāb us ke liye
har savāl us ke liye hai har javāb us ke liye

yuuñ savāl-e-vasl par Taalā kiyā barsoñ koī
sabr kar muztar na ho terā kahā ho jā.egā

mire savāl-e-visāl par tum nazar jhukā kar khaḌe hue ho
tumhīñ batāo ye baat kyā hai savāl puurā javāb aadhā

savāl-e-vasl par kuchh soch kar us ne kahā mujh se
abhī va.ada to kar sakte nahīñ haiñ ham magar dekho

milā na jazba-e-tashkīk ko libās koī
vo har savāl kā aisā javāb chhoḌ gayā

yuuñ bhī ġhalat umiid kā ilzām aa gayā
hālāñki har savāl mirā zābte meñ thā

tumhīñ batāo ki phir guftugū se kyā hāsil
javāb hone kī zid kar le jab savāl koī

dānā.iyāñ aTak ga.iiñ lafzoñ ke jaal meñ
itne javāb gum haiñ mire ik savāl meñ

idhar se dast o nigāh o zabāñ tamām savāl
udhar se ek sukūt-e-girāñ javāb meñ thā

sau baar jism-o-jāñ ko banānā paḌā savāl
is tajribe se ab to hazar chāhiye mujhe

savāl-e-ishq par tā-hashr chup rahnā paḌā mujh ko
har ik ilzām ko hañste hue sahnā paḌā mujh ko

kahāñ milā maiñ tujhe ye savāl ba.ad kā hai
tū pahle yaad to kar kis jagah gañvāyā mujhe