Tags-Sawal

ajiib hai ye tamāshā ki mere ahd ke log
savāl karne se pahle javāb māñgte haiñ

savāl ye nahīñ mujh se hai kyuuñ gurezāñ vo
savāl ye hai ki kyuuñ jism o jaañ se bāhar hai

is meñ hamārī apnī ḳhudī kā savāl thā
ehsāñ nahīñ kiyā hai jo vaada vafā kiyā

mire saare savāl us kī nazar ke muntazir haiñ
vo dānista magar tāḳhīr karnā chāhtā hai

maiñ tirā aks huuñ ki tū merā
is savāl-o-javāb ne maarā

pūchhā jo savāl āsmāñ se
dhartī se javāb aa rahā hai

zamīñ bhī terī hai ham bhī tere ye milkiyat kā savāl kyā hai
ye qatl-o-ḳhūñ kā rivāj kyuuñ hai ye rasm-e-jañg-o-jidāl kyā hai

ik sarāpā savāl hai duniyā
ik mukammal javāb haiñ ham log

zarā sī baat se diloñ meñ itnā farq aa gayā
ta.alluqāt kā to phir savāl hī nahīñ rahā

tamām hasrateñ har ik savāl dafn kar chuke
hamāre paas ab koī savāl hī nahīñ rahā

savāl ye hai ki maiñ ne kisī se kyā paayā
javāb ye hai ki barsoñ kā ḳhvāb TuuT gayā

savāl-e-vasl pe ik baar aur ġhaur kareñ
bajā ki soch liyā hai durust hai phir bhī

mujhe yaad hai
vo anā-ba-dast savāl bhī

na maslahat na takalluf na inkisār kā hai
savāl TūTte rishtoñ ke e'tibār kā hai

vo phir se haath milāne ko mere paas aayā
savāl maiñ ne uThāyā munāfiqat kyā hai

merā sab kuchh thā sirf ek savāl
aur is kā javāb kuchh bhī na thā

mile haiñ tālib-e-īfā ko kuchh na.e va.ade
savāl aur hī kuchh thā javāb aur hī kuchh

ghar vāloñ se toḌ ke naatā kis ne paayā mujh ko
kahāñ phiroge shā.ir sāhab dast-e-savāl liye

savāl kartī ka.ī āñkheñ muntazir haiñ yahāñ
javāb aaj bhī ham soch kar nahīñ aa.e

ham ko to be-savāl mile be-talab mile
ham vo nahīñ haiñ saaqī ki jab māñgeñ tab mile