Tags-Saya

aadhī umr ke pas-manzar meñ shāna-ba-shāna gām-ba-gām
tū hai ki terī parchhā.īñ hai maiñ huuñ ki merā saaya hai

muddat huī guzrā thā idhar se mirā saaya
kab se yūñhī fōtpath pe ḳhāmosh paḌā huuñ

supurd-e-ḳhāk to kar aa.e maañ ko tum 'at.har'
ġhamoñ kī dhuup meñ saaya kahāñ se pāoge

kis kī chhāñv sā.ebāñ karte 'shafīq'
har shajar par ḳhauf kā saaya lagā

va.ada thā hamīñ se lab-e-bām aane kā honā
saaye kī tarah se pas-e-dīvār hamīñ the

hamārī zindagī par hai hamāre ishq kā saaya
ki ham jo kaam karte haiñ ḳhasārā hone lagtā hai

is jaltī dhuup meñ ye ghane sāya-dār peḌ
maiñ apnī zindagī unheñ de duuñ jo ban paḌe

maiñ ne jalte hue sahrā meñ tirā naam liyā
sā.ebāñ ḳhud hī chalā aaya hai saaya karne

jo saaya ho to Darūñ aur dhuup ho to jalūñ
ki ek naḳhl-e-numū ḳhāk-e-nauha-gar meñ huuñ

kisī gumān kā saaya na shak kī parchhā.īñ
sarāb hai na jharoka nazar kī rāhoñ meñ

dhuup meñ jalte haiñ tab saaya bantā hai
baḌe jatan se koī apnā bantā hai

ai dopahar kī dhuup batā kyā javāb duuñ
dīvār pūchhtī hai ki saaya kidhar gayā

jaan liyā hai lekin mānñā baaqī hai
tū saaya hai aur saaya Dhal jaatā hai

zahe qismat ki saaye daar bhī hai bā samar bhī
mire sar par mohabbat kā shajar kitnā hasīñ hai

mirī javānī ke garm lamhoñ pe Daal de gesuoñ kā saaya
ye dopahar kuchh to mo.atadil ho tamām māhaul jal rahā hai

maiñ ab apnā jism nahīñ huuñ sirf tumhārā saaya huuñ
mausam kī ye barf pighalte ek zamāna biit gayā

mere pīchhe mirā saaya hogā
pīchhe muḌ kar bhī bhalā kyā karnā

ġhamoñ kī dopahar meñ kaam aayā
kisī ke reshmī āñchal kā saaya

girtī huī dīvār kā saaya thā tirā saath
phir bhī tirī bāhoñ se judā the to hamīñ the

bas ret sī uḌtī hai ab us rāhguzar par
jo peḌ bhī milte haiñ vo saaya nahīñ karte