Tags-Saya

kis ne kahā hai dīvāroñ par saaya kartā hai sūraj
dīvāroñ par dīvāroñ kā apnā saayā hotā hai

dard kī dhuup nahīñ yaad kā saaya bhī nahīñ
ab to qismat merī be-rañgī-e-hālāt huī

mujhe mat do mubārakbād-e-hastī
kisī kā hai ye saaya chal rahā hai

peḌ kā saaya nahīñ phal bhī zarūrat hai mirī
dil bhī darkār hai terā mujhe din raat samet

ek saaya pas-e-dīvār bhī lahrātā thā
sansanī itnī hama-gīr bhī ho saktī thī

koī palkoñ se utartī raat ko roke zarā
shaam kī dahlīz par ik saaya hai sahmā huā

har shāḳh-e-tamannā par merī har-chand ki barg-o-bār lage
vo peḌ jo mere naam kā hai, har aañkh ko sāya-dār lage

lo zo.af se ab ye hāl-e-tan hai
saaya mutajassis-e-badan hai

is kaḌī dhuup meñ saaya kar ke
tū kahāñ hai mujhe tanhā kar ke

kisī kī raah meñ aane kī ye bhī sūrat hai
ki saaya ke liye dīvār ho liyā jaa.e

saaya bhī yahāñ duur zarā ham se chalegā
ye shahr hī aisā hai ki anjān raheñge

saaya nahīñ hai duur tak saa.e meñ aa.eñ kis tarah
ham aa ga.e haiñ kis taraf tum ko batā.eñ kis tarah

us par bhī dushmanoñ kā kahīñ saaya paḌ gayā
ġham sā purānā dost bhī āḳhir bichhaḌ gayā

ek saaya sā phaḌphaḌātā hai
koī shai raushnī se guzrī hai

dhuup thī saaya uThā kar rakh diyā
ye sajā tāroñ kā mahzar rakh diyā

dhuup meñ itnī suhulat bhī ġhanīmat hai mujhe
ek saaya mirā ham-zād banā phirtā hai

badan par baar hai phūloñ kā saaya
mirā mahbūb aisā nāznīñ hai

dar-o-dīvār par saaya paḌā hai
havāoñ meñ namī kā zā.iqa hai

abrū-e-ġhilmāñ hai vo mehrāb-e-dar
zulf-e-hūrā saaya hai dīvār kā

saaya us āftāb-tal.at kā
dīda-e-mah kā nuur hotā hai