Tags-Saya

miTTī kī imārat saaya de kar miTTī meñ hamvār huī
vīrānī se ab kaam hai aur vīrānī kis kī yaar huī

mah-vashoñ ke ārizoñ meñ dekhte haiñ apnā aks
allāh allāh apnā saaya bhī kahāñ rakhte haiñ ham

yahī hai anjām zindagī kā lahū meñ Duubā hai dekho sūraj
chamak rahā thā jo āsmāñ par ab us kā saaya bhī Dhal rahā hai

ajab ḳhvāhish hai sar se āsmāñ kā saaya uTh jaa.e
zamīñ āb-e-ravāñ meñ zer-e-pā tabdīl ho jaa.e

ḳhāmoshiyāñ mere saath saarī bahār kā mo.ajaza haiñ
saaya jahāñ guzishta ka.ī dinoñ se taḌap rahā hai

kis dasht-e-talab meñ kho ga.e ham
saaya jo milā to so ga.e ham

pighal rahā huuñ khaḌī dhuup hai mire sar par
ki ik daraḳht kā saaya huuñ ghaT rahā huuñ maiñ

koī saaya koī ḳhushbū koī sadā koī dastak
ummīdoñ kī sej sajā.e ham aahaT aahaT jaage

apnā paikar apnā saaya kaale kos kaThin
duurī kī jab sañgat TuuTī koī qarīb na thā

haiñ ajiib murġh-e-shikasta-par na chaman meñ ghar na qafas meñ ghar
jo gire to saaya haiñ ḳhaak par jo uThe to mauj-e-havā hue

chale saath saath qadam qadam koī ye na samjhā ki haiñ baham
kabhī dhuup ban ke lipaT ga.e kabhī saaya ban ke judā hue

lagtā hai muqaddar meñ mire saaya nahīñ hai
muddat se safar meñ huuñ to ghar kyuuñ nahīñ aayā

dohre pattoñ ke zer-e-sāya huā
sab qalam-band haal bose kā

itnī sham.eñ thiiñ terī yādoñ kī
apnā saaya bhī apnā saaya na thā

har pal merā rasta dekhā kartā hai
jaane kis kā saaya ḳhālī kamre meñ

sochtā huuñ tirī tasvīr dikhā duuñ us ko
raushnī ne kabhī saaya nahīñ dekhā apnā

myaañ ġhurbat meñ har ik be-sahārā chhoḌ jaatā hai
añdherā ho to saaya bhī hamārā chhoḌ jaatā hai

jis taraf jaave tū ai ḳhurshīd-rū saaye kī tarah
har qadam maiñ bhī huuñ tere saath saath aur paas paas

baaġh kī qabr pe rote hue dekhā thā jise
nazar aayā vahī saaya sar-e-dīvār mujhe

kahīñ bādal kahīñ sūraj kahīñ saaya kahīñ dhuup
mire ma.abūd tirā koī labāda bhī to ho