Tags-Saya

kahāñ kahāñ liye phirtā kashāñ kashāñ mujh ko
lipaT gayā hai mire paañv se mirā saaya

us ko batāo jism se kaT kar
rah nahīñ saktā saaya tanhā

ye kyā huā ki aaj bahut tez dhuup hai
saaya milā na shāḳh-e-tanāvar ke ās-pās

aaj jab us lutf-e-sāya kī zarūrat thī hameñ
kam-nasībī ye ki dast-e-mehrbāñ ḳhālī huā

mere sar par rah ke bhī mujh par na saaya kar sakā
merī qismat se kahāñ miltā hai āñchal kā mizāj

vo harf hī to hamāre sar par
jo ek sāya-numā shajar thā

ye zikr hai us tavīl maazī kā maiñ akelā thā is bharī kā.enāt meñ jab
faqat mirī jāñ-gudāz tanhā.ī saaya ban kar thī saath mere

dam-bhar kī ḳhushī bā.is-e-āzār bhī hogī
is raah meñ saaya hai to dīvār bhī hogī

kahīñ se saaye bhī aa ga.e haiñ mujhe sunāne kahānī apnī
koī fasāna bhī dhīre dhīre buland manzar se ho rahā hai

jin kā saaya maaoñ kī āġhosh se kuchh kam na thā
qatl ke ahkām haiñ ab un daraḳhtoñ ke liye

pahle to sāya-fagan thā ḳhaak ho jaane kā ḳhauf
phir diloñ se rañj-e-umr-e-rā.egāñ bhī miT gayā

kisī ke saath ab saaya nahīñ hai
koī bhī aadmī puurā nahīñ hai

jaa.eñ to kidhar jaa.eñ bahke hue manzil se
dhūpeñ bhī ghanerī haiñ saaya bhī ghanerā hai

chalne meñ saaya ham-qad-e-jānāñ hai dūsrā
kyā saaf misra.a ek se chaspāñ hai dūsrā

ujḌā huā makān hai dastak na dījiye
saaya koī kahīñ se nikal kar lipaT na jaa.e

aa.ina dekhte pīchhe se jo maiñ aa niklā
aks par aks huā sāya-fagan aa.ine meñ

tamām log isī hasrat meñ dhuup dhuup jale
kabhī to saaya ghanere shajar se niklegā

''hayāt-e-dā.imī'' likkhā huā hai jin ke aivāñ par
iram-zār-e-abad hai sāya-zan jin ke ḳhayābāñ par

madār-e-vaqt vo gunjā.isheñ zarā phir se
ki paḌ raheñ kisī dīvār-e-sāya-dār ke saath

raat aa.ī to talab sham.a nahīñ kī dil ne
dhuup niklī hai to saaya nahīñ māñgā tujh se