Tags-Saya

jis ko tuubā zamāna kahtā hai
tere ghar meñ hai sāya-dār daraḳht

maiñ ne rāhat kā Thikāna ab talak paayā nahīñ
dhuup kī bārish hai lekin duur tak saaya nahīñ

thā abas ḳhauf ki āseb-e-gumāñ maiñ hī thā
mujh meñ saaya sā koī aur kahāñ maiñ hī thā

maiñ to aisā koī manzar kabhī dekhā na thā
din Dhalā jaatā thā aur saaya koī lambā na thā

terī parchhā.īñ huuñ nādān judā.ī kaisī
merī āñkhoñ meñ phirā ḳhauf kā saaya kaisā

is chāñdnī kī zad se bachā le koī mujhe
merā hī saaya mujh ko Darātā dikhā.ī de

ai nigār-e-dil-o-jāñ shauq kī bāhoñ meñ machal
saaya saaya yūñhī āġhosh-e-chaman-zār meñ chal

dil meñ hotā na mire daḳhl balā-e-kākul
saaya rahtā na kabhī girya makāñ kil jaatā

shajar āñgan kā jab sūraj se larzāñ hone lagtā thā
koī saaya mire ghar kā nigahbāñ hone lagtā thā

paḌā thā saaya bas ik baar dast-e-shafqat kā
so ab ye sar hai mirā aur kisī ke haath kā bojh

yaad aatā rahā kūcha-e-raftagāñ sar pe sāya-fagan hijr kā āsmāñ
nā-rasā.ī ke sadme nikharte rahe dil jalāte rahe aur ham so ga.e

ye bhī mumkin hai mirā saaya mirā saath na de
ye bhī mumkin hai mujhe terī kumak aa jaa.e

jumbish-e-mizhgāñ ke zer-e-sāya nādārī kī raat
jauhar-e-insāniyat joḌe hue āñkhoñ meñ haat

ik dhuup se uljhā huā saaya hai ki maiñ huuñ
ik shaam ke hone kā bharosa hai ki tum ho

jaane kyā hogā har ik dil ko ye dhaḌkā kyā hai
duur tak phailā huā ḳhauf kā saaya kyā hai

jab maiñ chalūñ to saaya bhī apnā na saath de
jab tum chalo zamīn chale āsmāñ chale

jīte-jī kūcha-e-dildār se jaayā na gayā
us kī dīvār kā sar se mire saaya na gayā

kis muñh se kījiye lab-e-jān-baḳhsh kā bayāñ
chūsī jinhoñ ne ahmad muḳhtār kī zabāñ

koī bhī shakl ubharnā muhāl thā yaaro
hamāre saaye ke uupar shajar kā saaya thā

un ke badalne kā mujhe afsos kuchh nahīñ
afsos ye hai apnā hī saaya badal gayā