Tags-Saya

raah kā ruup banī dhuup apnī
koī saaya na shajar yaad aayā

yādoñ ke darpan TuuT ga.e nazroñ meñ koī sūrat hī nahīñ
lekin be-chehra maazī saaya saaya lahrā.e hai

dekhā jo saaya shab meñ ye samjhā nigāh ne
shāyad vo aaj aa ga.e va.ada nibāhane

baiThā jo us ke saaya meñ dīvāna ho gayā
saaya parī kā hai tirī dīvār ke liye

zulmateñ sāya-fagan haiñ har taraf
bām-o-dar par raqs meñ nau-mīdiyāñ

jo saaya ham-qadam ban kar safar meñ saath rahtā thā
hamesha ke liye ḳhud se alag kal kar diyā maiñ ne

raushnī ke qarīb jitnā huuñ
qad meñ utnā hī merā saaya hai

kaisā saaya thā ki gul kī us ne saarī raushnī
saath apne dhund kī dīvār tak vo le gayā

jo saaya kheltā hai abhī merī god meñ
ik din vo mere qad ke barābar bhī aa.egā

raushnī meñ kahīñ ugal degā
merā saaya nigal gayā hai mujhe

yaaro maiñ is nazar kī bulandī ko kyā karūñ
saaya bhī apnā dekhtā huuñ āsmān par

saaya nahīñ thā niiñd kā āñkhoñ meñ duur tak
bikhre the raushnī ke nagīñ āsmān par

chāñdnī meñ sāya-hā-e-kāḳh-o-kū meñ ghūmiye
phir kisī ko chāhne kī aarzū meñ ghūmiye

āñkhoñ ko tālāb banā kar ke apnī
ik banjāra saaya dekhā kartā hai

hai ta.āqub meñ 'na.īmī' saaya sā ik roz o shab
dost hī shāyad ho koī muḌ ke to dekho zarā

gesuoñ kā ho ghanā saaya ki shiddat dhuup kī
vo mujhe jis rañg meñ rakhtā hai jī letā huuñ maiñ

tishnagī kī vo shiddat ko bhūlegā kyā dhuup kī vo tamāzat ko bhūlegā kyā
terī be-faiz āñkheñ jise yaad haiñ terā be-sāya gesū jise yaad hai

tirchhe sūraj ne sunī sāya-darāzī kī duā
aur ūñchī huī kotāh-qadoñ kī āvāz

mire āñgan meñ jab bhī shaam ke saa.e utarte haiñ
mujhe 'shāhīñ' mohabbat kā hī saaya yaad aatā hai

mujhe to ishq meñ ab aish-o-ġham barābar hai
ba-rañg-e-sāya vajūd-o-adam barābar hai