Tags-Saya

dhuup utrī hai na rāhoñ meñ ghanā saaya hai
ab tire ba.ad tire shahr meñ kyā rakhā hai

abhī koī saaya nikal aa.egā
zarā jism ko raushnī to dikhā

zamīñ-gīr ho ijz se tū ki ik din
ye dīvār kā saaya dīvār hogā

yādash-ba-ḳhair sāya-fagan ghar hī aur thā
lauTā musāfirat se to manzar hī aur thā

gor-e-kāfir kis liye hai tīra-o-tār is qadar
paḌ gayā saaya magar merī shab-e-dījūr kā

ghar se niklo dhuup meñ baiTho dekho us pīpal kā saaya
jis ke nīche tum aisā ik bholā bachcha khel rahā thā

hamīñ par dhuup barsātā hai sūraj bhī muqaddar bhī
daraḳht-e-mehrbāñ koī kare saaya to ham par bhī

dekh lenā ghar se niklegā na ham-sāya koī
ai mire yaaro mire dard-āshnāo chup raho

maiñ be-samar hī sahī phir bhī sāya-dār to huuñ
kaḌī ho dhuup to mujh meñ panāh le lenā

us ke ruup kī dhuup kā saaya chhāñv bichhāte peḌoñ par
us kī shoḳh hañsī kā charchā shahr ke qahva ḳhānoñ meñ

shāḳh-dar-shāḳh ek saaya hai
chāñd jo hai pas-e-shajar hai yahāñ

maiñ chaḌhī dopahar kā saaya thā
ab shaam tilmilā rahī thī

DhūñDte phirte rahe the saaya saaya zindagī
dhuup kī galiyoñ meñ sub.h-o-shām gasht apnī hī thī

tirī parchhā.īñ to le aa.uuñ ghar tak
kahīñ apnā hī saaya bhuul jā.ūñ

ḳhvāhish-e-sāya mujhe chalne na degī 'shāhīñ'
raah kī pahlī ye dīvār girā aane de

bahut se peḌ ādam-ḳhor-ḳhaslat vaale hote haiñ
'navāz' har peḌ ke saaye meñ sustāyā nahīñ jaatā

dil sī vīrānī meñ saaya koī mehmān to hai
apne ḳhvāboñ se mulāqāt kā imkān to hai

roz ye ḳhvāb Darātā hai mujhe
koī saaya liye jaatā hai mujhe

shāyad isī malāl meñ vo dhuup Dhal ga.ī
saaya chalā gayā kahīñ dīvār chhoḌ kar

TuuTī huī dīvār kā saaya to nahīñ huuñ
maiñ terā hī bhūlā huā va.ada to nahīñ huuñ