Tags-Saya

saare shajar shādābī sameTe apnī apnī
dhuup meñ gahrā saaya kar ke baiTh ga.e haiñ

jab tak maiñ pahuñchtā huuñ kaḌī dhuup meñ chal kar
dīvār kā saaya pas-e-dīvār na ho jaa.e

saaya ho shajar kā to kahīñ baiTh ke dam leñ
manzil to bahut duur hai aur dhuup kaḌī hai

shaam kā manzar uljhā rasta ek kahānī tū aur maiñ
Dhaltā sūraj baḌhtā saaya kashtī-rānī tū aur maiñ

ik saaya sharmātā lajātā raah meñ tanhā chhoḌ gayā
maiñ parchhā.īñ DhūñD rahā huuñ TuuTī huī dīvāroñ par

vo ek saaya thā umr bhar kī thakan kā hāmil
vo ek saaya jo kho gayā hai masāfatoñ meñ

dhuup ko kuchh aur jalnā chāhiye
jism kā saaya pighalnā chāhiye

apne safar meñ yuuñ to akelā huuñ maiñ magar
saaya sā ek raah ke har moḌ par mile

patthar pe mirī sadā kā saaya
ā.īna dikhā rahā hai mujh ko

sūraj kī shuāoñ se ulajhtā hai musalsal
saaya hai abhī vaqt kī bāhoñ meñ paḌā hai

saaya ban kar saath chaleñge saath phireñge saath raheñge
apne ghar meñ ġhair ke dil meñ jaao jidhar tum aa.eñ udhar ham

saaya kyuuñ jal ke huā ḳhaak tujhe kyā ma.alūm
tū kabhī aag ke dariyāoñ meñ utrā hī nahīñ

jal gayā dhuup meñ yādoñ kā ḳhunuk saaya bhī
be-navā dasht-e-balā meñ koī ham sā bhī nahīñ

kyā gumāñ thā ki na hogā koī ham-sar apnā
din Dhale saaya muqābil huā baḌh kar apnā

peḌ kā dukh to koī pūchhne vaalā hī na thā
apnī hī aag meñ jaltā huā saaya dekhā

qad tirā ai but-e-gul-posh ho gar sāya-fagan
to qayāmat ho sar-e-ḳhāk-e-shahīdāñ paidā

aab o saaya ek dhokā hī sahī
is se pahle bhī ka.ī dhoke hue

apnā saaya bhī judā lagtā hai apnī zaat se
ham ne us se dil lagāne kī sazā paa.ī bahut

kab is siyāh-baḳht ne chhoḌā kisī kā saath
dasht-e-junūñ meñ saaya mirā ham-rikāb thā

kuchh aise kam-nazar bhī musāfir hameñ mile
jo saaya DhūñDte haiñ shajar kāTne ke ba.ad