Tags-Sayyad

dhuup meñ rakh qafas na ai sayyād
sāya-parvarda-e-chaman huuñ maiñ

jo kuchh chaar tinkoñ ko ham jānte haiñ
vo gulchīn-o-sayyād kam jānte haiñ

gosha-e-amn nahīñ aaj bhī bulbul ko nasīb
chashm-e-sayyād bahar-sū nigarāñ aaj bhī hai

vahī tanhā.ī kā aalam vahī sayyād kā ḳhauf
apnā zindāñ huuñ to āzād na kar luuñ ḳhud ko

muuñd ai par-e-shikasta na chāk-e-qafas ki ham
Tuk yaañ ko dekh lete haiñ sayyād kī taraf

sayyād ne tere asīroñ ko āḳhir ye kah kar chhoḌ diyā
ye log qafas meñ rah kar bhī gulshan kā nazārā karte haiñ

chaman meñ ghūmne phirne ke kuchh ādāb hote haiñ
udhar hargiz nahīñ jaanā udhar sayyād rahtā hai

mujhe lagtā hai ab merā hī qaidī
mirā sayyād hotā jā rahā hai

ishq-e-pechāñ kā chaman meñ jaal phailā dekh kar
bulbuloñ ko sarv par dhokā huā sayyād kā

ḳhushī ho ho ke ḳhud sayyād kahtā hai anādil se
bahār aa.ī huī hai chahchahā.e jis kā jī chāhe