Tags-Sayyad

kuchh is andāz se sayyād ne āzād kiyā
jo chale chhuT ke qafas se vo giraftār chale

sayyād ke sitam se rihā.ī kā zikr kyā
sau daam the qafas se sar-e-shāḳh-sār tak

ab qafas meñ hī rahne de sayyād
thā kahāñ āshiyāñ nahīñ ma.alūm

ham ḳhud hī nahīñ chāhte sayyād se bachnā
sāzish nigah-o-dil kī munazzam bhī bahut hai

rahe sayyād har dam jis chaman meñ
vahāñ ġham kī hikāyat jāvedāñ hai

na thī parvāz kī tāqat sar-e-dīvār-e-gulshan tak
ki jo taa.ir thā so sayyād ke hāthoñ se be-par thā

murġh-e-zīrak the tah-e-dām na aa.e hargiz
uḌ ga.e ham sar-e-sayyad pe minqār lagā

phūkūñgā nasheman kī tarah apne use bhī
is vāste sayyād kā ghar DhūñDh rahā huuñ

mehrbānī mire sayyād kī dekhe koī
jab ḳhizāñ aa.ī mujhe qaid se āzād kiyā

phūloñ se chaman ābād bhī the daam apnā liye sayyād bhī the
sab kuchh thā 'jamīl' is gulshan meñ badlī jo havā to kuchh bhī nahīñ

sayyād tujh ko kis ne kahā thā ki fasl-e-gul
mujh ko qafas meñ kar ke giraftār maar Daal

parvāz tā-ba-arsh agar tū ne kī to kyā
sayyād-e-marg hai tirī nit ghaat meñ lagā

chheḌtā kyuuñ hai ḳhudā ke liye sayyād mujhe
nau-giraftār huuñ aatī nahīñ fariyād mujhe

hai jor-e-sayyād hī kā sadqa chaman kī hañgāma-āfrīnī
tabāhiyāñ jis jagah pe hoñgī vahīñ kahīñ zindagī milegī

rihā kartā nahīñ sayyād ham ko mausam-e-gul meñ
qafas meñ dam jo ghabrātā hai sar de de paTakte haiñ

dosh-e-sayyād ke tarkash se fazā sahm ga.ī
dekhtā kaun ki tarkash meñ koī tiir bhī hai

āshiyāñ meñ ab kisī sūrat nahīñ paḌtā hai chain
thī nazar tāsīr meñ Duubī huī sayyād kī

naġhma-e-pur-dard chheḌā maiñ ne is andāz se
ḳhud-ba-ḳhud mujh par nazar paḌne lagī sayyād kī

na kar dil-jūī ai sayyād merī
ki fitrat hai bahut āzād merī

har murġh-e-ḳhush-alhāñ ab parvāz pe maa.il hai
gulshan meñ na rah jaa.e sayyād kahīñ tanhā