Tags-Shaam

visāl-e-yār kī ḳhvāhish meñ aksar
charāġh-e-shām se pahle jalā huuñ

raqs kartī huī kirnoñ ke talātum kī qasam
arsa-e-dahr pe ab shaam nahīñ chhā saktī

savād-e-shām-e-ġham meñ yuuñ to der tak jalā charāġh
na jaane kyuuñ thakā thakā udaas udaas thā charāġh

dariyā kī sair karne akele chale ga.e
shām-e-shafaq kī aap hī tahsīn ham ne kī

phuul chehre ye sar-e-rāh sitāra āñkheñ
shaam hote hī tirā naam sujhāne lag jaa.eñ

shahr se kyā ga.ī jānib-e-dasht-ezar zindagī fāḳhta
bain karne lagī aa ke shām-o-sahar mātamī fāḳhta

ham sitāroñ meñ tirā aks nā Dhalne deñge
chāñd ko shaam kī dahlīz pe jalne deñge

kisī akelī shaam kī chup meñ
giit purāne gā ke dekho

bharā huā tirī yādoñ kā jaam kitnā thā
sahar ke vaqt taqāzā-e-shām kitnā thā

shaam se aañkh meñ namī sī hai
aaj phir aap kī kamī sī hai

hamārā shām-e-tanhā.ī meñ pursāñ hī na thā koī
vo jis mahfil meñ jaate the vahīñ yāroñ kā melā thā

aarzū hai ki shab-e-qadr ho yā shām-e-ummīd
kuchh dikhā.e na ḳhudā tere dikhā kar gesū

jo niklā shām-e-dasht-e-karbalā se
sitāra ḳhanda-peshānī se niklā

ye chaḌhtī dhuup kā malbūs utaar de sar-e-shām
utartī dhuup meñ ab dekhtā hai shahr tujhe

kyā ḳhabar thī sub.h ho jā.egī tere nuur se
shaam se merā charāġh-e-ḳhāna ruḳhsat māñgtā

ik girdāḌī sahrā samet ik mauj uThī dariyā samet
duniyā-e-ḳhāk-o-āb meñ thā koī shaam aayā huā

hai zarra zarra par sadā ahlav-va-sahlan marhabā
kyā sar-zamīn-e-dil pe hai vo aaj shaam aayā huā

shaam hote hī bujh gayā 'ājiz'
ek muflis kā ḳhvāb thā na rahā

lazzat-e-sub.h-o-shām bhuul ga.e
dil jo bhun kar kabāb thā na rahā

ye dhuup chhāñv kā khel hai yā ḳhizāñ bahāroñ kī ghaat meñ hai
nasīb sub.h-e-urūj ho to nazar meñ shām-e-zavāl rakhnā