Tags-Shaam

dilkash dikhā.ī dete haiñ jo log sub.h-dam
un par nazar na Dāloge tum shaam hone tak

sunā hai phuul jhaḌe the jahāñ tire lab se
vahāñ bahār utartī hai roz shaam ke saath

mujh se phir chhuTte hue abr-e-alam ne ye kahā
aaj kī shaam palaT ā.eñge ġham-ḳhvār tire

zulmat meñ kyā tamīz safed-o-siyāh kī
furqat meñ kuchh hisāb nahīñ sub.h-o-shām kā

uTThe tirī naqāb to uTh jaa.e ek baar
sab tafraqa ye roz-o-shab-o-sub.h-o-shām kā

ye vo mausam hai jis meñ koī pattā bhī nahīñ hiltā
dil-e-tanhā uThātā hai sa.ūbat shām-e-hijrāñ kī

inhīñ galiyoñ meñ khulte the mulāqātoñ ke darvāze
inhīñ galiyoñ meñ chaltī haiñ havā.eñ shām-e-hijrāñ kī

iztirāb-e-dard meñ had se guzar jaanā nahīñ
husn-e-shām-e-ārzū kā ruup Dhalte dekhnā

na sub.h koī yahāñ aur na shaam hai apnī
kisī se kaise kahūñgā kahāñ maiñ rahtā huuñ

mire asbāb meñ mashkīza-o-ḳhurjīn rakhnā
safar kī shaam hai aur regzār aane lagā hai

yūñhī be-sabab na phirā karo koī shaam ghar meñ rahā karo
vo ġhazal kī sachchī kitāb hai use chupke chupke paḌhā karo

hijr kī shab hai aur mirā dil
shaam hī se ghabrāne vaalā

kal thake-hāre parindoñ ne nasīhat kī mujhe
shaam Dhal jaa.e to 'mohsin' tum bhī ghar jaayā karo

sub.h-e-ruḳh se kaun shām-e-zulf meñ jaatā thā aah
ai dil-e-shāmat-zada shāmat lagā kar le ga.ī

kabhī aisā bhī karnā
shaam kī dahlīz par

zamānoñ ko uḌāneñ barq ko raftār detā thā
magar mujh se kahā Thahre hue shām-o-sahar le jā

gumāñ kī be-rañg sā.atoñ meñ
navāh-e-karb-o-balā se darbār-e-shām tak ham

ye 'nasīr' shām-e-supurdagī kī udaas udaas sī raushnī
ba-kanār-e-gul zarā dekhnā ye tumhī ho yā koī aur hai