Tags-Shaam

ye vahī log haiñ jo din meñ the mere jaise
shaam ke vaqt nazar aate haiñ saaya saaya

duur pahāḌī kī choTī par rotī rah ga.ī dhuup
raat añdhere se duniyā kā saudā kar ga.ī shaam

mere bichhḌe dost se kitnī miltī-jultī hai
aa.ī aur aa kar āñkhoñ ko dariyā kar ga.ī shaam

ātā, chāhe koī na aatā aas to thī din bhar
ab kyā rasta dekheñ rasta dhundlā kar ga.ī shaam

duur ufuq par kis kī āñkheñ ro ro ho ga.iiñ laal
ret kināre kis kā āñchal giilā kar ga.ī shaam

kitnī mushkil se bahlā thā ye kyā kar ga.ī shaam
hañste gaate dil ko pal meñ tanhā kar ga.ī shaam

panchhī lauTe maahī lauTe to bhī lauT 'hasan'
dhartī ambar kā manzar suunā kar ga.ī shaam

DhūñDne se gar nahīñ miltā ḳhudā phir DhūñDhiye
sub.h us kī justujū meñ shaam honā chāhiye

raat jab aa.ī to din bhar kā fasāna likkhā
jab chalī bād-e-sahar shaam suhānī likkhī

kitnī shadīd hai ye ḳhunuk surḳhiyoñ kī shaam
sulgā hai vo sukūt ki tār-e-nazar kaTe

tujhe dekhā hai jab se shām-ālūda
mirī āñkhoñ meñ din utrā nahīñ hai

charāġh-e-shām hī tanhā nahīñ hai
havā maiñ ne bhī ghar dekhā nahīñ hai

kisī shaam mere jilau meñ thā koī ḳhvāb vus.at-e-shahr kā
kisī sub.h mere vajūd par ye zamīn logoñ ne tañg kī

kyā kahūñ uubne lagā huuñ 'jamāl'
ek hī jaise sub.h o shaam se maiñ

hamārī sub.h hujūm-e-balā kī nazr huī
hamārī shaam bhī dasht-e-gumāñ maiñ baiTh ga.ī

mirī thakan mire qasd-e-safar se zāhir hai
udaas shaam kā manzar sahar se zāhir hai

shaam Dhale us ko nadiyā par aanā thā
sūraj Dhalte Dhalte jīvan biit gayā

sahar apnī na apnī shaam ai 'naqsh'
kisī majbūr ke shām-o-sahar kyā

vahī āsmān hai vahī zamīñ magar aañkh us kī jo phir ga.ī
na vo din hai ab na vo raat hai na vo sub.h hai na vo shaam hai

kisī kī yaad ke lamhe hamāre dil kī taraf
ibādatoñ ke liye sub.h-o-shām aate haiñ