Tags-Shahr

kuchh dinoñ dasht bhī ābād huā chāhtā hai
kuchh dinoñ ke liye ab shahr ko vīrānī de

ye aag aur ḳhuuñ ke samundar meñ girtā huā shahr merā nahīñ
havā se ulajhtā huā maiñ chalā jā rahā huuñ añdherā hai gahrā ghanā be-amāñ

havā se ulajhtā huā maiñ uḌā jā rahā huuñ añdherā hai gahrā ghanā be-amāñ
maiñ bulātā huuñ āvāz detā huuñ ab us hasīñ shahr ko

'matīn' shahar bhī sahrā-nazhād hai itnā
ki sañg-o-ḳhisht meñ dīvār-o-dar meñ ham bhī haiñ

ḳhush-bū shahr-e-badī kā jaadū ek hadīs-e-tilism huī
hauz meñ khiltā gul-e-bakā.ulī ḳhush-bū is meñ paltī hai

fazā-e-shahr baḌī ḳhush-gavār thī lekin
palak jhapakte hī kaisā ajiib manzar thā

luT ke manzil se koī yuuñ to na aayā hogā
jis tarah chhoḌ ke ham shahr-e-adam nikle haiñ

abhī kuchh din mujhe is shahr meñ āvāra rahnā hai
ki ab tak dil ko us bastī kī shāmeñ yaad aatī haiñ

dīvānoñ par haath na Daalo is zid meñ pachhtāoge
saare shahr meñ kis kis ko tum zanjīreñ pahnāoge

hamāre shahr kī āñkhoñ ne manzar aur dekhā thā
magar aḳhbār kī ye surḳhiyāñ kuchh aur kahtī haiñ

ham ahl-e-shahr kī ḳhvāhish ki mil-jul kar raheñ lekin
amīr-e-shahr kī dilchaspiyāñ kuchh aur kahtī haiñ

jalā huuñ dhuup meñ ik shahr-e-rañg-o-bū ke liye
milī hai tishna-labī sair-e-āb-e-jū ke liye

faras ko duur kiyā sar se taaj utaar diyā
tumhāre shahr meñ pahuñchā to maiñ piyāda huā

bazm-e-ālam hai tavajjoh se usī ke ābād
shahr vīrāñ hai agar jānib-e-sahrā hai vo ruḳh

vaqt ne ḳhaak vo uḌaa.ī hai
shahr ābād the jo Tiile hue

sar ko Takrā ke gayā hai koī sahrā kī taraf
ḳhuun sābit hai abhī shahr kī dīvāroñ se

kitnī tārīkī hai shahr-e-dil-o-jāñ par taarī
koī andāza nahīñ kaun kidhar jā.egā

nashsha hai raah kī duurī kā ki hamrāh hai tū
jaane kis shahr meñ ābād karūñgā tujh ko

ki jagmagātī udāsī hai shahr meñ tere
chalo udāsī kā mil kar mazā liyā jaa.e

ham baulā.e un ko DhūñDā karte haiñ
saare shahr kī galiyāñ ham par hañstī haiñ