Tags-Shahr

shahr tārāj hai, jabr kā raaj hai
phir bhī sābit haiñ merī anā aur maiñ

na kisī kamān meñ tiir hai na gulāb haiñ kisī haath meñ
mire shahr ke sabhī log haiñ kisī ajnabī sī kitāb se

gadā-e-shahr-e-ā.inda tahī-kāsa milegā
tajāvuz aur tanhā.ī kī had par kyā milegā

miTTī ko yahāñ paañv pakaḌnā nahīñ aatā
maiñ shahr meñ bhī gard ke tūfāñ kī tarah thā

apne ḳhuuñ ko ḳharch kiyā hai aur kamāyā shahr
saare manzar TuuT ga.e aur kaam na aayā shahr

be-ghar honā be-ghar rahnā sab achchhā Thahrā
ghar ke andar ghar nahīñ paayā shahr meñ paayā shahr

saat samundar paar bhī āñkheñ mere saath na aa.iiñ
chāroñ jānib ḳhvāb haiñ mere aur parāyā shahr

kaale shahr ko raushan rakkhā shahr ke logoñ ne
dīvānoñ ne diye jalā.e aur bujhāyā shahr

shahr ke ūñche burj bhī mere qad se chhoTe the
chhoTe chhoTe logoñ ne kyā ḳhuub banāyā shahr

idhar bhī aa.egī shāyad vo shāh-bānu-e-shahr
ye soch kar sar-e-bāzār rahnā chāhtā huñ

amīr-e-shahr tū apnī qabā-e-zar ko bhī dekh
sab is meñ taar mire reza-e-kafan ke haiñ

ḳhud apne shahr kī tahzīb bhuul baiThe haiñ
ye kaun log haiñ aur jaane kaise ban ke haiñ

vaise hameñ nadāmat-e-be-chehragī nahīñ
har-chand tere shahr meñ be-nām-o-nañg haiñ

mirī havas ke muqābil ye shahr chhoTe haiñ
ḳhalā meñ jā ke na.ī bastiyāñ talāsh karūñ

aziyyatoñ kī bhī apnī hī ek lazzat hai
maiñ shahr shahr phirūñ nekiyāñ talāsh karūñ

itnī chāhat se na dekhā kījiye mahfil meñ aap
shahr vāloñ se hamārī dushmanī baḌh jā.egī

maiñ ne kahā thā do hī haiñ ham shahr-e-sitam se jaane vaale
us ne kahā thā bastī meñ kuchh aur bhī sāthī ruke hue haiñ

sab ko maiñ un kī kitāboñ meñ nazar aatā huuñ
log paḌhte haiñ tire shahr meñ ghar ghar mujh ko

isī pe shahr kī saarī havā.eñ barham thiiñ
ki ik diyā mire ghar kī muñDer par bhī thā

ye kaisā shahr hai kaisī hai sar-zamīñ us kī
jahāñ kī ḳhaak palaTtā huuñ sar nikaltā hai