Tags-Shahr

tark-e-tāz-e-ġhamza kā us kī yahī Dar hai 'razā'
ye ġham-ābād apnā shahr-e-dil kahīñ vīrāñ na ho

koī asā bhī nahīñ aur hai akelā tū
amīr-e-shahr kā azhdar nigal bhī saktā hai

karo na zid ki kisī shahr kī taraf jā.ūñ
mire aziiz ye dil hai machal bhī saktā hai

har ek shaḳhs kā chehra udaas lagtā hai
ye shahr merā tabī.at-shanās lagtā hai

terā hī charchā nahīñ shahr meñ bāzāroñ meñ
kitne aḳhbār-o-rasā.il meñ chhapā huuñ maiñ bhī

is shahr ko ab chhoḌ ke kyā jā.ūñ ki mujh ko
rokā hai kisī aah ne fariyād ne bāñdhā

jaan aise ḳhvāboñ se kis tarah chhuḌā.ūñ maiñ
shahr so gayā saarā ab kise jagā.ūñ maiñ

sham-e-tanhā kī tarah sub.h ke taare jaise
shahr meñ ek hī do hoñge hamāre jaise

ye shahr shahr kī ābādiyāñ fanā kī taraf
ye jītī-jāgtī āñkhoñ meñ vahshat-e-sahrā

khā gayā insāñ ko āshob-e-ma.āsh
aa ga.e haiñ shahr bāzāroñ ke biich

ġharīb-e-shahr huuñ ghar hai na kārobār koī
kabhī bichhātā kabhī oḌhtā rahā kāġhaz

chaḌhte hī dhuup shahr ke khul jā.eñge kivāḌ
jismoñ kā rahguzār ravānī meñ aa.egā

raḳht-e-safar bhī hogā mire saath shahr meñ
sahrā bhī shauq-e-naql-e-makānī meñ aa.egā

hifāzat karte haiñ ham shahr-e-dil kī
kahīñ sote koī shab-ḳhūñ na maare

shahr jab ḳhud-kafīl hai sāhab
kaun kis kā malāl kartā hai

koī na shāyad jaan sakegā sūraj kī matvālī chaal
shahr meñ kyuuñ hai dhuup kī shiddat bāhar kuchh aur andar kuchh

roz zaḳhmī hotā thā merā badan
pattharoñ ke shahr meñ rahtā thā maiñ

saj rahī haiñ phir siyāsī manDiyāñ chāroñ taraf
dekhnā tabdīl hogā shahr qabristān meñ

huā hai shah kā musāhib phire hai itrātā
vagarna shahr meñ 'ġhālib' kī aabrū kyā hai

sañg haiñ nāvak-e-dushnām haiñ rusvā.ī hai
ye tire shahar kā andāz-e-pazīrā.ī hai