Tags-Shahr

siyāh shahr kī qismat meñ merā faiz kahāñ
charāġh-e-nazr huuñ jaltā huuñ āstānoñ meñ

mubārak fāl-e-nek ai ḳhusrav-e-shahr
mujhe farhād farmāyā gayā hai

ham shahr kī dīvāroñ meñ khiñch aa.e haiñ yaaro
mahsūs kiyā thā ki idhar saa.e haiñ yaaro

huā huuñ qarya-e-jāñ maiñ kuchh is tarah pāmāl
ki sar-buland tire shahr-e-zar-nigār meñ huuñ

darinde shahr meñ ābād ho ga.e saare
sunā hai saath kā jañgal baḌī amaan meñ hai

is shahr ke logoñ pe ḳhatm sahī ḳhush-tal.atī-o-gul-pairahnī
mire dil kī to pyaas kabhī na bujhī mire jī kī to baat kabhī na banī

koī aur bhī morid-e-lutf huā milī ahl-e-havas ko havas kī sazā
tire shahr meñ the hamīñ ahl-e-vafā milī ek hamīñ ko jalā-vatanī

ajiib jaarī huā ab ke hukm-e-hākim-e-shahr
asiir saare taraf-dār-e-rañg-o-bū kiye jaa.eñ

is shahr-e-dil-āzār meñ ab dekhnā ye hai
rahtī hai yūñhī yūrish-e-āzār kahāñ tak

kyuuñ shahr ujaaḌ sā paḌā thā
kyā sar pe pahāḌ aa paḌā thā

faqīh-e-shahr zindagī kī aañkh kā jo nuur thā
vo maiñ ne tere āstāñ pe ḳhvāb lā ke vaarā hai

aap ne ḳhud ko ḳhud hī shahr meñ aam kiyā hai
kyuuñ nahīñ ab ye log satā.eñ aap batā.eñ

shahr kab se hisār-e-dard meñ hai
ye ḳhabar ab avaam ko pahuñchī

paḌā huā maiñ kisī aa.ine ke ghar meñ huuñ
ye terā shahr hai yā ḳhvāb ke nagar meñ huuñ

mirī parakh ko bhī ā.eñge jauharī 'betāb'
huuñ la.al-e-nāb magar shahr-e-kam-nazar meñ huuñ

ajnabī shahr meñ thā pahlā paḌāv merā
baam se jhuk ke sitāre ne kahā bismillāh

is shahr ke qātil ko dekhā to nahīñ lekin
maqtal se jhalaktā hai qātil kī javānī hai

raunaqeñ tujh se thiiñ saarī so tire saath ga.iiñ
shahar kā shahar huā ek khañDar tere ba.ad

shahr-e-vafā kā sajda-e-shukrāna hai yahī
patthar se sar paTakte haiñ shahr-e-butāñ ke log

kyuuñ tire dard ko deñ tohmat-e-vīrānī-e-dil
zalzaloñ meñ to bhare shahr ujaḌ jaate haiñ