Tags-Shahr

har galī kūche meñ rone kī sadā merī hai
shahr meñ jo bhī huā hai vo ḳhatā merī hai

tumhāre baad ujāle bhī ho ga.e ruḳhsat
hamāre shahr kā manzar bhī gaañv jaisā hai

jalā hai shahr to kyā kuchh na kuchh to hai mahfūz
kahīñ ġhubār kahīñ raushnī salāmat hai

tamām shahr meñ tash.hīr mere bad-ḳhū ne
payām-bar ko kiyā bāñdh kar gale kāġhaz

ra.īs-e-shahr ko maiñ jāntā huuñ
koī ummīd tum us se na rakhnā

ham ko aapas meñ mohabbat nahīñ karne dete
ik yahī aib hai is shahr ke dānāoñ meñ

uThtī thiiñ darīchoñ pe hamārī bhī nigāheñ
apnā bhī kabhī shahr-e-nigārāñ meñ guzar thā

har kūche meñ armānoñ kā ḳhuun huā
shahr ke jitne raste haiñ sab ḳhūnīñ haiñ

kāñch ke shahr meñ patthar na uThāo yaaro
mai-kada hai ise maqtal na banāo yaaro

us shaam vo ruḳhsat kā samāñ yaad rahegā
vo shahr vo kūcha vo makāñ yaad rahegā

shahr kā shahr huā jaatā hai kaise sairāb
kaun aayā hai yahāñ le ke samundar sā.īñ

koī kuchh bhī na kahe shahar-e-adāvat hī sahī
ham to ābād hue haiñ yahāñ luT kar sā.īñ

meñ apne shahr ke naqsh-o-nigār bhuul gayā
kisī ne luuT liyā mujh ko chaaT gaañv meñ

ye kaisā shahr hai maiñ kis ajā.ib-ghar meñ rahtā huuñ
maiñ kis kī aañkh kā paanī huuñ kis patthar meñ rahtā huuñ

agar mohlat mile to qātilān-e-shahr se pūchhūñ
maiñ kis kī jaan huuñ kyuuñ sīna-e-ḳhanjar meñ rahtā huuñ

na dastakeñ na sadā kaun dar pe aayā hai
faqīr-e-shahr hai yā shahryār dekhiyegā

jab bhī kholā hai da-e-shahr-e-masarrat to koī
phir se nāshād jahānoñ meñ mujhe le ke chalā

har kūche meñ armānoñ kā ḳhuun huā
shahr ke jitne raste haiñ sab ḳhūnīñ haiñ

merī barahnagī pe hañse haiñ vo log bhī
mash.hūr shahr bhar meñ jo nañg-e-libās the

shahr-e-dil meñ is tarah har ġham ne pahchānā mujhe
jaise merā naam thā dīvār par likkhā huā