Tags-Shahr

sahrā meñ liye phirtī hai dīvāngī-e-shauq
kyā shahr meñ tere dar-o-dīvār nahīñ the

chhīnā hai tū ne shaam ke ruḳh se salonā-pan
ab shahr-e-ārzū se ujālā bhī chhīn le

fasīl shahr kī itnī buland o saḳht huī
ki kul sipāh mazāmīn-e-tāj-o-taḳht huī

bujhā charāġh thī maiñ hāsidoñ kī āñkhoñ meñ
duā ke shahr meñ aa.ī to sabz baḳht huī

ye mo.ajiza bhī kisī kī duā kā lagtā hai
ye shahr ab bhī usī bevafā kā lagtā hai

rafāqatoñ ke samundar meñ shahr baste haiñ
har ek shaḳhs mohabbat kā ik jazīra hai

chāhtā huuñ phūñk duuñ is shahr ko
shahr meñ in kā bhī ghar hai kyā karūñ

būḌhī rivāyatoñ se bhare ek shahr meñ
yuuñ bas gayā huuñ jaise ki be-ghar nahīñ huuñ maiñ

kuchh aur bikhar kar kahīñ pahchān na kho luuñ
is shahr ko miTī mirī raas aa.ī kahāñ hai

ujaaḌ shahar ke raste jo ab sunāte haiñ
yaqīn kartā hai kab un kahāniyoñ pe koī

vahī dard hai vahī bebasī tire gaañv meñ mire shahr meñ
be-ġhamoñ kī bhiiḌ meñ aadmī tire gaañv meñ mire shahr meñ

yahāñ har qadam pe savāl hai vahāñ har qadam pe malāl hai
baḌī uljhanoñ meñ hai zindagī tire gaañv meñ mire shahr meñ

kise dost apnā banā.eñ ham kise dil kā haal sunā.eñ ham
sabhī ġhair haiñ sabhī ajnabī tire gaañv meñ mire shahr meñ

haiñ sabhī kī apnī zarūrateñ koī kaise bāñTe mohabbateñ
na ḳhulūs hai na hai dostī tire gaañv meñ mire shahr meñ

na vo husn hai na hijāb hai na vo ishq meñ tab-o-tāb hai
na vo ābrū-e-vafā rahī tire gaañv meñ mire shahr meñ

maiñ ilāj-e-ġham bhī na kar sakā tirā jaam to bhī na bhar sakā
hai har ek moḌ pe tishnagī tire gaañv meñ mire shahr meñ

ye hasad jahāñ kī nazar meñ hai ġham-e-'dānā' un ke jigar meñ hai
hai sabhī ko pyaar se dushmanī tire gaañv meñ mire shahr meñ

adū kī fauj ne luuTā to kyā sitam ye hai
'ra.īs'-e-shahr bhī shāmil isī sipāh meñ thā

thī saare shahr ko bīmārī-e-girāñ-goshī
so chup vatīra kiyā ham ne hāv-hū kar ke

nikal ga.e haiñ jo bādal barasne vaale the
ye shahr aab ko tarsegā chashm-e-tar ke baġhair