Tags-Shahr

vo jis se shahr-e-'tasavvur' meñ raushnī hotī
sitāra aisā koī āsmāñ meñ thā hī nahīñ

na ahl-e-dānish ke dām-o-dāna kā said honā
na shahr vāloñ ke lutf kā e'tibār karnā

kal ke andāz bhī dilkash the ye taslīm magar
aaj bhī shahr-e-nigārāñ meñ nikal kar dekho

qillat ḳhulūs kī hai mohabbat kā kaal hai
is shahr-e-nā-sipās meñ jiinā muhāl hai

chūhoñ ne ik shahr basāyā
behad ālī-shān

ai shahr-e-sañg tujh meñ zaḳhmoñ kī kyā kamī hai
teġh-e-adā-e-jalva behtar hai ham na DhūñDeñ

shahr meñ baste haivānoñ se Dar lagtā hai
mujh ko aise insānoñ se Dar lagtā hai

chamkā hai kis kī yaad kā sūraj ḳhayāl meñ
raushan huā hai shahr-e-ḳhayālāt ḳhud-ba-ḳhud

ab ham jaan ga.e haiñ ki añdhere hamārā muqaddar nahīñ the
balki tum ne shahr kī tamām strēt-lights bujhā dī thiiñ

ye shahr chhoḌ ke jaanā bhī mārka hogā
ajiib rabt imārat se pattharoñ kā hai

ḳhudā ne kis shahar andar haman ko laa.e Daalā hai
na dilbar hai na saaqī hai na shīsha hai na pyāla hai

bhiik is shahr meñ milnā koī āsān nahīñ
ya.anī majbūr kamāne kī taraf lauT aa.e

kis qadar dilkash lagīñ sapne meñ galiyāñ shahr kī
khul ga.ī jab aañkh to phir vo hasīñ manzar na thā

gum hai tanhā.iyoñ meñ shahr kā shahr
kaise in jañgaloñ ko paar kareñ

kal apne shahr kī bas meñ savār hote hue
vo dekhtā thā mujhe ashk-bār hote hue

phir shahr meñ ayyām-e-guzishta kī uḌī raakh
phir zad meñ ka.ī jubba-o-dastār bhī aa.e

sahrā-navard shahr kī saḌkoñ par aa ga.e
chehre pe gard ābla-pā sar khulā huā

chāroñ taraf udaas safedī bikhar ga.ī
vo aadmī to shahr kā manzar badal gayā

shahr-e-vīrāñ meñ hazāroñ ḳhvāb le kar ik diyā
zad pe tūfānoñ kī hogā aur jalā rah jā.egā

ḳhushk-sālī to nahīñ hai shahr meñ 'mahvar' magar
abr kab barsā.eñge allāh-miyāñ ab ke baras