Tags-Shahr

is qadar tez chalī ab ke havā-e-nā-būd
chaah kar shahr-e-tamannā kā khañDar dekh na paa.e

ab aur chalne kā is dil meñ hausla hī na thā
ki shahr-e-shab meñ ujāle kā shā.iba hī na thā

shahr meñ phir barf-bārī ho rahī hai
aa bhī jaao ab december aa gayā hai

aa.e kabhī to dasht se vo shahar kī taraf
majnūñ ke paañv meñ jo na zanjīr-e-jāda ho

'habāb' shahr-e-sabā meñ vo qumqumoñ kī bahār
galī galī meñ farozāñ the sīm-o-zar ke charāġh

is baar un se kah do qadam soch kar rakheñ
ujḌā jo phir ye shahr basāyā na jā.egā

aag barsī thī badī ke shahr par
ik hamārā bhī shanāsā jal gayā

sach to ye hai ki mire paas hī dirham kam haiñ
varna is shahr meñ is darja girānī bhī nahīñ

tamannāoñ ke andhe shahr meñ jab māñgne niklo
to chādar sabr kī sadiyoñ purānī pusht par rakhnā

vahī jo shahr ke logoñ meñ thā bahut bad-nām
vahī to aaj sarāpā sipās kaisā hai

is shahr ke jitne baasī haiñ vo gūñge bahre haiñ varna
un par bhī khule ye ahl-e-qalam likhte haiñ yā chillāte haiñ

kū-e-dildār meñ baaqī nahīñ shorīda-sarāñ
shahr daryūza-gar-e-kūcha-e-shohrat hai miyāñ

ā.ankhoñ kā nuur siine meñ mahfūz kar liyā
is shahr meñ jo honā paḌā be-basar mujhe

tum ne jab shahr ko jañgal meñ badal Daalā hai
phir to ab qais ko jañgal se nikal aane do

na chhat hogī na dar hogā na sahn-e-yār kā gosha
maiñ shahr-e-āfiyat meñ yuuñ guzāra kar ke dekhūñgā

jānib-e-kūcha-o-bāzār na dekhā jaa.e
ġhaur se shahr kā kirdār na dekhā jaa.e

shahr kā shahr gunahgār to ho saktā hai
jab kahīñ koī gunahgār na dekhā jaa.e

shauq kī ek umr meñ kaise badal sakegā dil
nabz-e-junūn hī to thī shahr meñ Dūbtī ga.ī

yahī hai zid to hathelī pe apnī jaan liye
amīr-e-shahr se kah do ki ham nikalte haiñ

shahr meñ sach boltā phirtā huuñ maiñ
log ḳhā.if haiñ mire anjām se