Tags-Shahr

biktī nahīñ faqīr kī jholī hī kyuuñ na ho
chāhe ra.īs-e-shahr kī bolī hī kyuuñ na ho

'ḳhātir' ab ahl-e-dil bhī bane haiñ zamāna-sāz
kis se kareñ vafā kī talab apne shahr meñ

pāra-e-dil hai vatan kī sarzamīñ mushkil ye hai
shahr ko vīrān yā is dil ko vīrāna kaheñ

us kī raunaq meñ bahut sunsān se lagte the ham
shahar se nikle to vīrānī se bāhar aa ga.e

jab taḳhayyul isti.āroñ meñ Dhalā to shahr meñ
der tak husn-e-bayāñ ke tazkire hote rahe

purānā shahr
vaqt-e-shām

ḳhud apne shahr meñ apnā shanāsā.ī nahīñ koī
na jaane justujū apnī ye kis manzil pe laa.ī hai

sunā hai maqtal meñ aaj koī qatīl-e-hasrat shahīd hogā
huī jo shohrat ye shahar meñ hai har ik taraf ek sansanī hai

qalb-e-paivandi-e-ġham to hogī
shahr meñ koī dhaḌaktā huā dil

is gird-o-navāh meñ utrā thā
ik shahr-e-navā

thoḌī sī jagah mujh ko bhī mil jaa.e kahīñ par
vahshat tire kūche meñ mire shahar se kam hai

ham abhī kuchh der pahle saath the
shahr saarā yuuñ lagā thā

ye shahr tamām andoh meñ hai
is raat sipāhī gasht par aayā nahīñ

har ek shaḳhs bhaTaktā hai tere shahr meñ yuuñ
kisī kī jeb meñ jaise tirā patā hī na ho

hamāre shahr kī miTTī hai shar-pasand bahut
yahāñ fasīl-e-hifāzat abhī na rakkhī jaa.e

ye kaise jāntā gar shahr meñ aayā nahīñ hotā
yahāñ dīvār hotī hai magar saaya nahīñ hotā

shahr-e-sitam bhī jashn-e-amāñ mat manā abhī
shāyad sitamgaroñ ko tirā ghar nahīñ milā

sūraj kā gaañv jis kī jatāoñ meñ thī asiir
ai shahr-e-be-charāġh ye vo raat bhī nahīñ

miTTī ke sab makān zamīñ-doz ho ga.e
naqshe meñ ab talāsh karo apne shahr ko

shahr-e-ta.alluqāt meñ uḌtī hai jin se ḳhaak
fitne vo sab ra.ūnat-e-pindār se uThe