Tags-Shahr

shahr meñ ik qatl kī afvāh raushan kyā huī
ik taraf takbīr thī aur ik taraf jai kī pukār

tishnagī vīrāñ darīche muflisī āh-o-bukā
ai amīr-e-shahr is manzar kā bhī dīdār kar

jism meñ phailne lagā hai shahr
apnī tanhā.iyāñ bachā rakhnā

kisī insān ko apnā nahīñ rahne dete
shahr aise haiñ ki tanhā nahīñ rahne dete

kaun samjhe sukūt kī bāteñ
shahar ḳhāmoshiyoñ kī bastī hai

bar-sar-e-ām ye kahte haiñ ki ham jhūTe haiñ
is bhare shahar meñ zinda hai sadāqat ham se

tamām shahr kī ta.amīr dhuup ne kī hai
milegī chhāñv bhī us kā hī aasrā le kar

shahr ḳhālī hai kise eid mubārak kahiye
chal diye chhoḌ ke makka bhī madīna vaale

kahāñ bānegā to DeḌh iiñT kī masjid
tamām shahr to shāmil hudūd-e-shāh meñ hai

nikal paḌe haiñ sanam raat ke shivāle se
kuchh aaj shahr-e-ġharībāñ meñ haiñ ujāle se

na jaane kaun sā ye shahr hai ki is ke ba.ad
hamāre gird jo rāheñ haiñ sab kaTīlī haiñ

kal raat un ġharīboñ ko qai kyuuñ na aa sakī
khānā amīr-e-shahr kā kyuuñ un ko pach gayā

ka.ī sar-zamīneñ sadā de rahī haiñ ki aao
ka.ī shahr mere ta.āqub meñ haiñ chīḳhte haiñ na jaao

yaad aa.ī apnī ḳhāna-ḳharābī bahut mujhe
dīvār jab bhī shahr meñ koī chunī ga.ī

kis ne dekhā hai mirā shahr-e-ḳhamoshān-e-hayāt
dil kī vaadī se guzarnā hai to āhista guzar

sikhā diye haiñ use sheva-hā-e-ḳhānqahī
faqīh-e-shahr ko suufī ne kar diyā hai ḳharāb

'nihāl' ko be piye hai mastī hai muft ilzām-e-mai-parastī
hai aam is shahr meñ rivāyat ye shaḳhs kuchh bāda-ḳhvār sā hai

'saifī' meñ apne aap meñ nīlām ho gayā
kis ko ḳhabar thī shahr meñ ik ḳhūb-rū huuñ maiñ

dekhne vaale to is shahr meñ yuuñ bhī kam the
ab samā.at bhī girāñ hai koī suntā hī nahīñ

kyā sitam hai ki mire shahr meñ merī āvāz
jaise āvāz-e-sagāñ hai koī suntā hī nahīñ