Tags-Shahr

kisī kī jaan kā zāmin nahīñ yahāñ koī
amīn-e-shahr kī jānib se ye munādī hai

isī shahr meñ ka.ī saal se mire kuchh qarībī aziiz haiñ
unheñ merī koī ḳhabar nahīñ mujhe un kā koī pata nahīñ

hādse kī vo kahānī muḳhtasar sī hai 'shakīl'
bāñsurī bhī baj rahī thī shahr bhī jaltā rahā

puujā ke phuul suukh ga.e intizār meñ
soyā huā hai shahr-e-butāñ jāgte raho

kyā rañj ki yūsuf kā ḳharīdār nahīñ hai
ye shahr koī misr kā bāzār nahīñ hai

bayābāñ ban hameñ ulfat nahīñ hai shahr se hargiz
tarah majnūñ ke 'tābāñ' ham to dīvāne haiñ jañgal ke

ye mirā shahr hai
ḳhūb-sūrat hasīñ

yahāñ to shahr se dīvār-o-dar hī ġhā.eb haiñ
chhatoñ ke ba.ad makānoñ ko le uḌī hai havā

tamām shahr thā saḌkoñ pe aaj raat ga.e
sunā hai phir se javānoñ ko le uḌī hai havā

ma.asūmiyat kahīñ par gum ho ga.ī hai 'aḳhtar'
lagtā hai shahr jā kar bachche badal ga.e haiñ

dasht se duur bhī kyā rañg dikhātā hai junūñ
dekhnā hai to kisī shahr meñ dāḳhil ho jaao

maiñ shahr-e-gul kā musāfir mare sharīk-e-safar
sa.ūbatoñ kī ye rāteñ ye din azāboñ ke

tamām umr phir ik karb kī chitā meñ jale
ham ek pal jo ruke shahar meñ gulāboñ ke

suunā shahr udaas galī
galī meñ thā ik saaya bhī

shahr-e-jāñ par ka.ī barsoñ se musallat hai jumūd
chheḌ kar dil ko chalo saaz kiye dete haiñ

jazba-e-shauqat-e-ta.amīr banā marqad-e-shauq
is na.e shahr ke ye tāj-mahal ghar to nahīñ

ik musāfir kī tarah huuñ koī ghar merā nahīñ
dil meñ kuchh āzār haiñ yā shahr hī achchhā nahīñ

sahrā meñ chīḳhte haiñ bagūle to shahr shahr
ik shor hai sukūt-fazā ġhaur se suno

har shahr hamārā gulshan ho
hañstā huā har ik āñgan ho

iḳhlās makīnoñ kā to dekhā nahīñ ab tak
haañ shahr ke sab kūcha-o-bāzār na.e haiñ