Tags-Shahr

mausam-e-shahr-e-nigārāñ kā koī Thiik nahīñ
gosha-e-dil meñ koī ātish-e-sozāñ rakhnā

roz aḳhbār kī jaltī huī surḳhī paḌh kar
shahr ke log tumhāre nahīñ achchhe lagte

shahr kaise ab haqīqat-āshnā ho
āgahī par zaat kā pahra rakhā hai

shahr kī is bhiiḌ meñ chal to rahā huuñ
zehn meñ par gaañv kā naqsha rakhā hai

jab tumhāre shahr kā har zarra zarra hai aziiz
kaun kahtā hai ki tum se pyaar ham karte nahīñ

ham ko bhī ma.alūm thā anjām kyā hogā magar
shahr-e-kūfa kī taraf ham bhī safar karte rahe

yuuñ to ham bhī kaun sā zinda rahe is shahr meñ
zinda hone kī adākārī magar karte rahe

na.e kapḌe badal aur baal banā tire chāhne vaale aur bhī haiñ
koī chhoḌ gayā ye shahr to kyā tire chāhne vaale aur bhī haiñ

ho shahr ke mutābiq hāsil har ik sahūlat
māhaul par sukūñ ho dehāt ke mutābiq

shāyad nikal hī aa.e koī chāragar 'figār'
ik baar aur dekh sadā kar ke shahr meñ

tū ra.īs-e-shahr-e-sitam-garāñ maiñ gadā-e-kūcha-e-āshiqāñ
tū amiir hai to batā mujhe maiñ ġharīb huuñ to burā hai kyaa?

kyā vasl kī saa.at ko tarasne ke liye thā
dil shahr-e-tamannā tire basne ke liye thā

mujh ko le Duubā tirā shahr meñ yaktā honā
dil bahal jaatā agar koī bhī tujh sā hotā

chāhtā huuñ phūñk duuñ is shahr ko
shahr meñ in kā bhī ghar hai kyā karūñ

sharm aatī hai ki us shahr meñ ham haiñ ki jahāñ
na mile bhiik to lākhoñ kā guzārā hī na ho

shahr-e-dil pe chhā.e haiñ dasht-e-ġham ke sannāTe
kitnī ārzūeñ haiñ sab kī sab magar ḳhāmosh

be-sutūñ ik navāhī meñ hai shahr-e-dil kī
tesha in.aam kareñ aur koī farhād rakheñ

āñkhoñ kā puurā shahr hī sailāb kar gayā
ye kaun mujh meñ nazm kī sūrat utar gayā

ḳhushbuoñ kā shahr ujḌā ghar se be-ghar ho ga.e
bādshāhat haath se niklī gadāgar ho ga.e

ḳhud se niklūñ to na.e shahr kā naqsha dekhūñ
ik zamāne se huuñ mahrūm-e-zamāna mire dost